La izquierda llaica y la pro-kurda salen reforzaes de les municipales turques

La formación socialdemócrata y llaica CHP ganó nes municipales del domingu nes ciudaes más poblaes de Turquía y en porcentaxe de votu al AKP del presidente Erdogan. Nel Kurdistán turcu, el DEM, coalición d’izquierda verde pro-kurda, ameyoró los resultaos del HDP nel 2019.

El Cumhuriyet Halk Partisi (CHP), Partíu Republicanu del Pueblu, ganó les eleiciones municipales en porcentaxe de votu. Con más del 99 por cientu escrutáu, sumaría un 37,7 por cientu del total por un 35,5 del islamista Adalet ve Kalkınma Partisi (AKP), Partíu de la Xusticia y el Desarrollu.

La oposición del presidente Recep Tayyip Erdogan caltendría’l gobiernu de la capita Ankara y d'İstanbul y İzmir, y ganaría en Bursa, la cuarta más poblada del Estáu. En capitales de provincia, xube de 22 a 36, mentes que l’AKP pasa de 38 y 23, y pierde unes eleiciones per primer vez dende la so fundación nel 2001.

Otra manera, nel Kurdistán turcu la izquierda verde representada pola formación pro-kurda Partiya Wekhevî û Demokrasiya Gelan/Halkların Eşitlik ve Demokrasi Partisi (DEM), Partíu de la Igualdá y la Democracia de los Pueblos, salió reforciada de les municipales. Ganó en ciudaes puestes baxo alministración xudicial llueu de la victoria del Partiya Demokratîk a Gelan/Halkların Demokratik Partisi (HDP), Partíu Democráticu de los Pueblos, nel 2019, y, a falta de finar col recuentu, controlaría 77 poblaciones de la zona, 12 más qu’algamaría va 5 años el partíu del que ye herederu.

D’elles, 10 son capitales de provincia, lo que supón un aumentu de 2 sobre’l 2019. Dende'l DEM celebraron los resultaos y afirmaron que ganó'l deséu de democracia nos territorios kurdos.

Na imaxe, Özgür Özel, presidente del CHP, saluda a militantes depués de conocer el resultáu de les eleiciones municipales. Semeya propiedá del Cumhuriyet Halk Partisi.