La irrenunciable oficialidá

A les 12 del meudía de mañana sábadu 2, va salir de la Estación del Norte (RENFE) d'Uviéu una manifestación convocada como respuesta a la riestra d'agresiones a la llingua asturiana que se vienen dando estos últimos meses y pa pidir la oficialidá del idioma como única solución democrática posible pa tornar estos fechos y como derechu ciudadanu elemental nuna sociedá billingüe como la asturiana.

La manifestación convócala una plataforma encabezada pola Xunta pola Defensa de la Llingua na que tán los sindicatos CC.OO. UGT, CSI y SUATEA, los partíos políticos Izquierda Xunida, URAS, PAS, Andecha Astur, Izquierda Asturiana, Lliberación y BIA, asina como colectivos culturales y d'artistes como el FAC.

Esta manifestación quier volver a recuperar l'espíritu de les grandes movilizaciones de mediaos de los noventa con motivu de la reforma del Estatutu d'Autonomía y que fueron inoraes polos responsables políticos daquella, pesllando en falso'l debate de la oficialidá.
D'esi momentu ye tamién la famosa "Llei d'Usu" que se vendió como un pasu alantre pa reconocer los derechos llingüísticos pero ye incumplida sistemáticamente pol Gobiernu asturianu, que lleva más de trescientes denuncies alministratives por siguir rotulando mal les carreteres autonómiques. Esta llei, cuatro años depués, demostróse que ye una ferramienta inútil dafechu no que se refier a protexer o garantizar l'usu del asturianu, como se vio na negativa del Conseyu d'Universidaes a dar de pasu la creación de la Especialidá Universitaria en Filoloxía Asturiana, o del MEC a equiparar l'asignatura d'asturianu a les demás, dexándola en "voluntaria" y ensin "plantilla" específica. Esto, xunto cola anulación de la oficialidá en conceyu de Castrillón o les ordenances d'usu del asturianu en Nava por parte de la Delegación del Gobiernu, la retirada de la llicencia concedida a Radio Sele, emisora n'asturianu pa emitir comercialmente y les repetíes denuncies toponímiques. Estes actuaciones represores de organismos oficiales y instituciones tuvieron toes argumentaes na falta d'oficialidá del asturianu y fueron el detonante de la manifestación del sábadu, que nun quier quedar nun fechu aislláu, sinón que s'encuadra dientro d'una campaña de movilizaciones por parte de les organizaciones convocante en defensa del idioma. Nesti sen, representantes de la plataforma procedieron cívicamente esta mañana a iguar un cartel de población incorrectu y illegal poniéndo-y el nome tradicional, como un actu simbólicu de denuncia énte lo que ye una evidente falta de derechos cudadanos y una irregularidá llegal.