La investigadora Pilar Calvo Holgado va encabezar la llista d’Equo al Congresu por Asturies

Pilar Calvo Holgado foi la persona escoyida’l martes pa encabezar la candidatura d’Equo al Congresu por Asturies tres la celebración de les primaries de la formación ecoloxista. La investigadora ye miembru de Greenpeace dende hai 15 años.
 
La candidatura de Calvo, que tamién collabora con Acnur y ye miembru del Conseyu Escolar nel Colexu Públicu San Claudio d’Uviéu, confirmóse ayeri tres sumar los votos presenciales a los ‘on line’ na asamblea que tuvo llugar nel Centru Municipal Integráu de L’Arena, en Xixón. Asina, la investigadora foi la persona con más apoyos y va encabezar una llista na que va tar acompañada –nesti orde– por Adrián Blanco García, Cristina Entrialgo Vega, Eduardo Campomanes Calleja, Natalia García Posada, Joaquín Arce Fernández, María Fernández López y José Antonio Ballesteros Garrido.
 
“Merecemos un proyeutu políticu distintu y ilusionante. Ufro tiempu y trabayu al serviciu de toos aquellos que deseen qu’una política ecosocial nueva marque presente y futuru”, resaltó Calvo, que considera que “ye’l momentu”. La intención de la candidata d’Equo ye impulsar el proyeutu nel país y “recoyer les sensibilidades, preocupaciones y propuestes” de los miembros de la Equocomunidá, asina como garantizar “la tresparencia n’aquelles cuestiones que tenga encomendaes”, aseguró.