La intersindical estatal de la enseñanza STES-i aprueba una resolución al favor de la oficialidá del asturianu

La Confederación de Sindicatos de Trabayadores de la Enseñanza Intersindical (STES-i) aprobó por unanimidá nel so Congresu Confederal que se celebró'l pasáu 18 y 19 de febreru en Madrid una resolución iniciativa del sindicatu asturianu SUATEA y na que pide la oficialidá del asturianu.

STES-i, confederación intersindical na que s'inxerta'l sindicatu asturianu d'enseñanza SUATEA ye una de les dos centrales sindicales mayoritaries nel estáu xunto cola estaya d'enseñanza de CCOO. Según comentaron a Asturies fontes de SUATEA, la resolución que se presentó nel so congresu d'esti fin de selmana y que s'aprobó por unanimidá con tolos demás sindicatos inxertos na confederación, parte del testu base que soscriben toles organizaciones pertenecientes al Conceyu Abiertu pola Oficialidá.

Asina, la resolución de STES-i parte de qu'Asturies "vive nuna situación de billingüismu desequillibráu, na que los derechos llingüísticos de la población que fala asturianu nun tán llegalmente reconocíos, lo que lleva a una minorización social y a una perda xeneracional d´esta llingua, incumpliéndose n´Asturies l´artículu 3 de la Constitución". Pa solucionar esta situación pídese "garantizar la igualdá de derechos civiles de manera que n'Asturies seya posible facer vida con total normalidá tanto n'asturianu como en castellanu" reconociendo la llingua asturiana, "como elementu central de la cultura d'esti pueblu" y afirmando que "con independencia de la ideoloxía, creyencia o militancia que tengan; como tal elementu fundamental de la nuestra identidá común, l'asturianu precisa un nivel de defensa y de promoción mui superior al que tien agora" polo que se pide la "necesidá inescusable de que la futura reforma del Estatutu d'Autonomía d'Asturies incluya la declaración d'oficialidá de la llingua asturiana, como única ferramienta llegal que pue garantizar el respetu a los derechos civiles de tolos asturianos y asturianes y la sobrevivencia de la nuestra llingua", espurriendo esti reconocimientu "al gallego-asturianu na fastera na que se fala".