La intención de Lastra d’abater a un o dos llobos más nel Parque de Picos d'Europa indigna a los ecoloxistes

|
La intención de Lastra d’abater a un o dos llobos más nel Parque de Picos d'Europa indigna a los ecoloxistes

“Mal empieza’l conseyeru Fernando Lastra si’l so oxetivu únicu na naturaleza asturiana ye matar más llobos”, critiquen grupos ecoloxistes nun comunicáu conxuntu. El socialista anunció que solicitara l’aumentu del cupu na parte asturiana del Parque de Picos.

Nun primer momentu, el conseyeru d’Infraestructures, Ordenación del Territoriu y Mediu Ambiente falo d’abater un exemplar más de llobu, anque finalmente podría ascender a dos. Hasta’l momentu, nel ‘Parque Nacional de Picos de Europa’ autorizóse la muerte de 4 llobos na parte asturiana y otros 4 na más cercana, llugares onde se mueven cuatro manaes.

“Mui mal empieza’l so llabor políticu’l conseyeru nuevu cuando anuncia que va reunise con tolos sectores implicaos y interesaos pa buscar un consensu nel tema del llobu, y toma decisiones ablucantes y absolutamente inxustificaes que nun crean dende llueu un ambiente de confianza na so persona nin nel so departamentu, sinón tolo contrario”, apunten los ecoloxistes, que califiquen la propuesta de Lastra de “esparate”.  Al empar, soliciten la retirada de la mesma, “que supón la muerte inxustificada d’una especie nel Parque Nacional”.

Los coleutivos firmantes del comunicáu son la Coordinadora Ecoloxista d’Asturies, l’Asociación para la Conservación y Estudio del Lobo (ASCEL), el Colectivo Ecologista de Avilés, l’Asociación Nacional Animales con Derecho y Libertad-ANADEL, l’Instituto para la Calidad y la Educación Ambiental-INSCEAM, l’Asociación Verdes Asturianos, l’Asociación Prolobos Asturias, l’Asociación Naturaleza d’Asturies, el Grupu de Ornitoloxia Mavea, los Voluntarios Censo del Lobo Ibérico en Asturias, SOS Cuideiru y la Plataforma Basta Ya de Envenenamientos.

Na semeya, reunión de la comisión de xestión del 'Parque Nacional de los Picos de Europa', tres la que Lastra dio l'anuncia.

Contador Estadistiques