La incidencia del cáncer sigue estable ente los varones asturianos y xube ente les muyeres pol consumu de tabacu

Los homes siguen ente los grupos de más riesgu del conxuntu del estáu, mentes que les muyeres permanecen na zona media.

La incidencia del cáncer ente los varones asturianos estabilizóse na zona más alta del conxuntu del estáu, onde s’axunten rexones del norte con una industrialización fuerte, como ye tamién el casu del País Vascu y árees de Cataluña. Nes muyeres, la incidencia xube llixeramente, anque permanez nuna posición intermedia dientro del conxuntu d’España.

Estes son dos de les conclusiones principales que pueden sacase p’Asturies del artículu Cancer incidence in Spain, 2015, publicáu na revista Clinical and Translational Oncology y nel que participen investigadores de la Conseyería de Sanidá.

Esti trabayu proporciona la incidencia de cáncer estimada pal 2015 por sexu y tipu de cáncer pa España nel so conxuntu, la evolución de la incidencia nes árees xeográfiques diferentes orixe de los datos y les tendencies estimaes d’incidencia n’España de 1993 al 2007.

Nos años últimos, la tendencia d’incidencia de cáncer n’homes estabilizóse por cuenta, fundamentalmente, de que la disminución de los cánceres rellacionados col tabacu compensó la xuba d’otros tipos de cáncer como los del colon y rectu, y la próstata.

Nes muyeres, a pesar de la estabilización de la tendencia de la incidencia del cáncer de mama, l’aumentu de la incidencia obedez, sobre too, al incrementu de los cánceres colorrectales y a los rellacionaos col consumu de tabacu.

También ye significativa la reducción del cáncer de larinxe y d’estómagu nel conxuntu de la población.

Los cinco cánceres más comunes nel conxuntu de la población asturiano fueron los de colon-rectu, próstata, pulmón, mama y vexiga urinaria, lo mesmo que nel restu del país. Por sexu, los cuatro cánceres más comunes n’homes fueron los de próstata (20,4 %) colon-rectu (16,6 %) pulmón (16,7 %), próstata (12,4 %), y vexiga urinaria (11,12 %). Nes muyeres, los más comunes fueron las de mama (27,5 %), Colon-rectu (15,2 %), cuerpu uterín (7,7 %) y pulmón (5,4 %). Estes cifres nun incluyen los cánceres de piel non melanomes que nun s’incluyen nesti rexistru.

L’estudiu concluye que pa reducir la incidencia de cáncer, les prioridaes en prevención del cáncer pa los años vinientes han ser la meyora de les polítiques de control del tabaquismu, la reducción del consumu d’alcohol y la estensión de la detección precoz del cáncer colorrectal como la qu’empezó Asturies nel área III y d’equí a poco va estendese a otres árees.

Menos mortalidá
La mortalidá por cáncer ente los varones asturianos desciende dende va dos décades a un ritmu anual del 1 %, mentes que, ente les muyeres, esta reducción estancóse dende’l 2003. Les muyeres asturianes tán perbaxo de la media nacional en cuantes a riesgu de carecer cualquier tumor y tán ente les que presenten menor riesgu d’Europa. Los varones, pela cueta, figuren ente los que presenten mayor riesgu de tol país y nel conxuntu de la UE.

Colos datos provisionales últimos disponibles, el cáncer provocó nel 2014 3.548 muertes n’Asturies, 2.116 en varones y 1.432 en muyeres, lo qu’indica que continúa siendo un problema grave de salú nel que ye menester siguir incidiendo dende’l puntu de vista de la prevención.

Vezos nocivos como’l tabaquismu, el consumu escesivu d’alcohol o la obesidá tán rellacionaos estrechamente col orixe de dalgunos de los cánceres más frecuentes. Salud Pública recuerda que la prevención basada n’hábitos de vida saludable constituye la estratexa más eficaz pa prevenir la enfermedá.