La ilesia católica despide a Xuan Pablo II

A les 9.37 minutos de la nueche del sábadu morría tres d'una llarga agonía Karol Wojtila, que dende 1978 mandaba la ilesia católica baxo'l nome de Xuan Pablo II. La Ilesia católica guarda agora nueve díes de llutu oficial a la espera de facer el cónclave del que va tener que salir el papa que va facer el númberu 265 nos más de 2.000 años de tradición dende l'apostol Pedro, fundador de la Ilesia Católica. 117 cardenales son los que van tener la capacidá pa escoyer a la voz nueva del Dios católicu na tierra nun conciliu envueltu nun complicáu ritual que va tener por escenariu la famosa Capiella Sixtina del Vaticanu. Los nomes que más suenen son los del Cardenal del Opus Dei Giovanni Battista Re, el Cardenal Xesuita Carlo María Martini, el patriarca de Venecia Angelo Scola, candidatu de Comunión y Lliberación, l'alemán Joseph Ratzinger, l'obispu de Milán Dionigi Tettamanzi, l'arxentinu José María Bergoglio, el de Sao Paulo Claudio Hummes, el de Mumbai (India) Ivan Dias, el de Tegucigalpa, Óscar Andrés Rodríguez y el nixerianu Francis Arinze, amás d'otros como Angelo Sodano o incluso'l gallegu Rouco Varela.

Con Xuan Pablo II pasa a la historia ún de los papaos más llargos de la historia y tamién un de los más polémicos. Axente activu na confrontación de la ilesia coles dictadures comunistes del este d'Europa, el papáu de Xuan Pablo II nun tuvo empachu en tratase con dictadores como Pinochet o enser el primeru en tomar parte en situaciones conflictives como la declaración d'independencia de Croacia nel añu 1993. Criticáu tamién pola so postura conservadora en cuestiones de moral y costumes y enemigu de les midíes de planificación familiar, Xuan Pablo II enterró l'espíritu aperturista que dexaren los papaos de Xuan XXIII y Pablo VI, responsables del Conciliu Vaticanu II. En cuenta d'ello, el papa viaxeru o el "atleta de Dios", como se-y llegó a conocer pola so fuerza física, convertióse nuna figura mediática de primer orde, viaxando a lo llargo de miles de kilómetros y protagonizando alcuentros masivos colos fieles. Ente los sos viaxes incluyó Asturies, que vieno a visitar nel añu 1989, dexando pa la galería la imaxe d'un Papa paseando pelos Llagos de Cuadonga.

Esi calter de figura mediática acompañó a Wojtila hasta'l final. El seguimientu de la enfermedá y muerte del Papa xeneraron una atención de los medios de comnunicación como nunca nun se viere enantes, y l'anuncia del so fallecimientu tuvo un gran impactu nos gobiernos de tol mundu, como ye'l casu de Francia, l'estáu más laicu de toa Europa y que declaró día de llutu oficial, una midida xustificada dende l'Elíseu pol calter del Papa como xefe del Estáu Vaticanu. Esti llutu oficial declarose tamién nel Estáu Español y nel Principáu d'Asturies, onde'l gobiernu asturianu mandó qu'ondearen a media asta les banderes nos edificios oficiales. El presidente Areces declaró que "desapaeció una de les grandes personalidaes del sieglu XX y son momentos murnios pa toos, al marxe de les creencies de caún".