La III Carrera per Montaña Puerta de Munieḷḷos abre la Copa d’Asturies

El domingu va celebrase en Mual la primer de les cinco pruebes que componen la Copa d’Asturies de Carreres per Montaña 2014. Trátase de la III Carrera per Montaña Puerta de Munieḷḷos, pa la que tán inscritos 387 deportistes.

Nesta tercer edición de la espectacular prueba destaca l’ampliación del percorríu hasta los 27 quilómetros, con un desnivel acumuláu de 3.900 metros. La salida ta prevista a les 9 hores de Mual, pa finar tamién nesti mesmu pueblu de Cangas del Narcea tres pasar per 18 quilómetros de sienda, 6,5 quilómentros de pista y 2,5 quilómetros de pista formigonada. Otra manera, como novedá, esti añu tamién va celebrase una carrera más curtia, destinada categoríes inferiores y persones que tean dando los sos primeros pasos nel mundu del trail. Ésta, con salida a les 16.30 hores del sábadu, va tener un llargor de 9 quilómetros, con un desnivel acumuláu de 900 metros, y 200 participantes.

A la Carrera Puerta de Munieḷḷos, ganada nel 2013 por Martín Álvarez Espinar (Piloña Deporte), va siguir na Copa d’Asturies de Carreres per Montaña la Carrera El Asturcón (6 d’abril), la Carrera Resistencia Reino Astur (19 de xunetu), el Trail de Valgrande (24 d’agostu) y el Quebrapates Peña Mea (7 de setiembre). Los vencedores del añu pasáu nesta competición entamada pola Federación de Deportes de Montaña, Escalada y Sienderismu del Principáu d’Asturies (FEMPA) foron Samuel Obaya Fernández (Avientu Centeno), en categoría masculina, y Marta Escudero Martínez (Peña Santa Llagar Casa Juan), en femenina.