La Hidroeléctrica estudia la lliberalización

Si l'otru día dábemos anuncia de la intención d'Hidroeléctrica de trancar media docena d'oficines d'atención al cliente, güei la empresa asturiana vuelve a ser noticia por motivos bien estremaos. Ello ye que La compañía eléctrica aconceya n'Asturies estos díes a los protagonistes del procesu internacional que ta llevando a la desregulación del mercáu enerxéticu, un procesu que s'anuncia como beneficiosu pal consumidor pero que nel estáu español yá va costando al erariu públicu más d'un billón de pesetes en conceptu de costes de transición a la competencia. Depués de qu'Asturies fore escenariu del conceyu del Ecofin y del Congresu de Ministros de Tresportes durante la presidencia española de la UE, el país recibe otra vuelta, anque esta vegada nun marcu menos institucional, a los axentes de la globalización, agora enerxética. Les alternatives pa l'articulación del mercáu ibéricu d'electricidá y el futuru d'un sector n'auxe que nun cansa de repartir beneficios tan analizándoles nel Hotel reconquista los responsables de les multinacionales más potentes que se reparten el mercáu, como EnBW, EDF, ENEL, Repsol-YPF o Shell.