La guerra d’Iraq sal otra vuelta a la cai

Con motivu del cabudañu del ataque a Iraq y énte la presencia entovía nel país del golfu Pérsicu de les tropes de la coalición qu'entamó l'ataque, organizaciones polítiques, sindicales, culturales y sociales de toa triba enxertes na Plataforma Asturiana Contra la Guerra convoquen mañana a una manifestación n'Uviéu que s'amesta a la xornada mundial de reivindicación contra la ocupación d'Iraq. La marcha, que va salir a la 1 del mediudía de la estación de la Renfe d'Uviéu, tien por lema "Nin guerra nin ocupación, retirada de les tropes y construción de la paz".

Va agora poco más d'un añu, el 15 de febreru del 2.003, una manifestación como nuncase viere tomó Uviéu pa pidir que nun se ficiere l'ataque a Iraq. La marcha foi la mayor de la historia n'Asturies, y namás la gran manifestación de duelu polos atentaos de Madrid de la otra selmana foi a facela pequeña.

La celebración de la marcha va coincidir cola presencia n'Asturies d' Awni al-Kalamyi, representante de l'Alianza Patriótica d'Iraq.Convidáu a facer una xira de conferencies per tol estáu español, pol Comité de solidaridá cola causa árabe, al-Kalamyi ye un esliáu del réxime de Saddam Hussein y representa a esti grupu que dende 1992 rechaza la ocupación y defende'l derechu del pueblu iraquí a resistir la ocupación, afalando la creación d'un Frente Políticu Unificáu de la resistencia qu'enxerte a tolos sectores y corrientes de la resistencia iraquí