La guerra dende la canal árabe

Una de les claves na guerra contra Iraq ye'l papel de los medios de comunicación. En teoría, los medios modernos y la rapidez en tresmitir les informaciones permiten a tol mundu tar al tantu, en tiempu real, de lo que pasa n'antigua Mesopotamia, pero en realidá la opinión pública tienlo difícil pa saber más allá de lo que dan los partes oficiales de los bandos en guerra, sobremanera pa dir más allá de los partes americanos, en cuantes que los medios y axencies más fuertes pertenecen al país atacante. En medio de too esto, la presencia d'una canal árabe de TV vien a ser una rabasera d'aire fresco que permite ver otros puntos de vista y tamién acceder dacuando a informaciones censuraes pol bandu americanu, como les imaxes de los soldaos presos estadounidenses.



Esi ye'l papel que ta cumpliendo la cadena qatarí Al Jazeera, una nueva estrella nel firmamentu de los medios de comunicación que llegó a la fama tres los ataques del 11 de setiembre al ser la canal pela que salíen los discursos d'Osama Bin Laden y qu'agora ye la única alternativa mediática a los partes de la Fox y la CNN, cadena que se bautizare pa les mases va doce años, cuando la primer guerra d'El Golfu. L'equipu d'Al-Jazeera fórmenlu mayormente periodistes del antiguu serviciu de noticies n'árabe de la BBC, que trancó por culpa de que los socios saudíes de la BBC mandaron censurar un documental sobre execuciones n'Arabia Saudí. Un grupu d'empresarios y notables de Qatar decidieron contratar a aquel garapiellu de profesionales pa montar una canal árabe. Yera l'aniciu d'Al-Jazeera

Sicasí, pal públicu occidental yera difícil hasta agora conocer les informaciones d'Al Jazeera, en cuantes que tolo que facíen yera n'árabe dafechu. Esta selmana, la canal qatarí ta acabante d'estrenar una páxina web especial n'inglés que va allegar les informaciones
de la guera a un públicu más grande, lo mesmo que'l serviciu de descarga d'imáxenes. Llamentablemente, los hackers tienenla tomada cola web de la canal árabe, que sufre del miércoles p'acá un ataque que la tien colgada casique de siguío



Otramiente, la presencia d'Al-Jazeera parez que-yos molesta a les institucciones americanes. Ayeri, la bolsa de Nueva York retiró-yos los pases de prensa a los reporteros de la canal árabe, que lleven años cubriendo esa información. La esscusa oficial foi la falta d'espaciu.