La gaita va ser protagonista nel San Xuan navetu

La banda de gaites La Raitana, xunta'l Conceyu de Nava entamen pa les
fiestes de San Xuan unes xornaes cola gaita como protagonista. Charres, meses
redondes , actuaciones de bandes de gaites y conciertos de grupos folk como
Felpeyu o La Bandina ye lo qu'ufierta Nava pal so San Xuan.



La iniciativa sal de la banda de gaites La Raitana, dirixida por Flavio
Rodríguez, qu'entamóestes xornaes col oxetivu de sirvir anguaño y nun futuru de puntu
d'alcuentru pa toos aquellos interesaos nel mundu de la gaita y en toles les
sos manifestaciones. Asina, esti añu'l tema que va tratase ye'l de les
bandes de gaites, tocándose dende'l so orixe y evolución hasta
cómo son -o como deberíen de ser- los concursos de bandes de
gaites. Ello ye que'l vienres 24 de xunu van tar a les 17:00 hores nel
Muséu de la Sidra xente como'l propiu Flavio Rodríguez, el
director de la banda de gaitas Zuncurrundullo de Lugo, Cándido
García y el director de la banda irlandesa, Carrigaline Pipe Band,
Michael Murphy.



Pero esa mesma nueche la palabra va dexá-y pasu a la música y
dende les 22:00 hores na plaza Manuel Uría van actuar l'irlandés
Michael Murphy, los asturianos La
Raitana, amás de la banda gallega
Zuncurrundullo y la
bretona Krevenn-Alré.
L'aportación folk va ser gracies a les actuaciones de
La
Bandina, col so discu acabantes de sacar y con munches ganes
d'enseñalu, y el grupo asturianu Felpeyu que tamién van tar acabantes
pero nel so casu d'aterrizar dempués de tocar dos díes enantes en
Beirut.



Les actividaes continuen al día siguiente con más
ponencies de nomes tan conocíos na gaita asturiana como José
Manuel Tejedor, Pedro Pangua y Martín Poladura. Pela mañana
tamién va facese un Alcuentru internacional de Bandes de Gaites col nome
de Memorial "Jairo García Iglesias", n'alcordanza del gaiteru
de La Raitana que morrió n'accidente de coche a últimos de 2003.