La Fundación Caveda y Nava celebró una xornada d'actos

La Fundación Caveda
y Nava celebró esti sábadu la primer "Xornada de la Fundación" na que la entidá recibió a dos socios nuevos nes persones de Gabino Díaz Merchán y Emilio Marcos Vallaure, el primeru ex-arzobispu d'Uviéu y el segundu, director del muséu de Belles Artes d'Asturies. Nun actu solemne que se fizo en Monesteriu de Valdediós, Merchán saludó a los demás miembros de la Fundación y pronunció unes pallabres en defensa de la llingua y cultura asturianes. Más radical foi la presentación d'Emilio Marcos Vallaure, quien aprovechó l'actu pa facer una defensa encesa de tolos valores de la cultura asturiana. Vallaure, que faló n'asturianu, al contrario que Merchán, declaróse heriede de la tradición asturianista de Juan Uría Ríu y del desapaecíu Joaquín Manzanares y refiriose siempre nel so discursu a Asturies como país.

Tres de los actos en Valdediós, qu'incluyeron la presentación de la memoria "llingua asturiana 2.003, l'estáu de la cuestión" el programa de la xornada treslladose a Villaviciosa, onde se-y rindió homenaxe a la figura de Xosé Caveda y Nava. Darréu d'ello la Casa la Cultura acoyó la mesa redonda "¿que cooficialidá fai falta n'Asturies?" na que participaron, énte un numberosu públicu, l'especialista nel aranés Alain Viaut y l'alicantín Josep Ochoa, especialista na situación xurídica del valencianu. Dambos espusieron el tratamientu llegal y les condiciones del réxime d'oficialidá de dambes llingües, llamando muncho l'atención les observaciones del xurista valencianu, que centró parte de la so intervención n'esplicar como l'estatutu valencianu contién delles referencies minorizantes a la llingua que, más de venti años depués de la so redacción, tan desfasaes dafechu pola propia evolución social y l'avance de la normalización del idioma.

Tres d'ellos faló'l caderalgu en derechu alministrativu de la Universidá d'Uviéu Leopoldo tolivar Alas, quien llamó enforma l'atención de los asistentes poles sos declaraciones sobre l'estáu de la cuestión n'Asturies. Tolivar, que ye autor del llibru "las libertades lingüísticas" fizo una intervención enforma interesante na qu'esplicó les faltes y contradicciones de la Llei d'Usu, insistiendo muncho en como la falta d'oficialidá y de concrección de la propia Llei d'Usu, arrequexen a l'asturianu en dellos ámbetos, dellos fundamentales pa llograr la so normalización, como ye'l de la educación. Ilustrando la so esposición con casos prácticos, el que foi candidatu pol PSOE a l'alcaldía d'Uviéu sorrayó delles ironíes derivaes de l'ausencia d'oficialidá y de los fallos de la Lei d'Usu, una llei que permite al ciudadanu dirixise a l'alministración n'asturianu pero que, a la contra, nun obliga a esta a responder na mesma llingua.

Asina, por poner un casu, Tolivar esplicó como la Llei d'Usu afala a que nos conceyos onde la denominación asturiana seya la mayoritaria namás se rotule n'asturianu, mientres que naquellos onde convivan les dos la rotulación tendría de ser billingüe. Según dixo'l ponente, ello nun pue ser porque lleis d'ámbetu superior a la Llei d'Usu apauten que pa poder rotular en billingüe ye preciso que la segunda llingua seya oficial, lo que permitiría poner rotulos nos dos idiomes, anque, irónicamente, rotular n'asturianu namás si ye posible.