La Fundación Juan Muñiz Zapico entregó los sos premios de relatos mineros

L'escritor Vicente García Oliva llevo col so relatu "Carta de Cuba" el premiu al accesit al meyor relatu n'asturianu dientro de la segunda edición del concursu "Manuel Nevado Madrid" de lliteratura minera qu'entama la Fundación Juan Muñiz Zapico y qu'acuta'l primer premiu pa obres en llingua castellana, onde'l ganador foi Gregorio Andrés Echevarría cola obra "Marionetas"

El microrrelatu"Na playa" d'Elisabeth Felgueroso, algamó una mención especial na categoría de llingua asturiana mientres que "Tu niña valiente" d'Irma Fernández ganó l'accesit d'autores mozos. Hebo menciones especiales moces pa "Cuéntame..." de Jara Gil Fernández, y pa "Volframio", d'Antonio Bazarra Maneiro, mientres "Mineras", de Roberto Rodríguez Gutiérrez y "La sirena", de Jesús Manzano Cano tuvieron menciones especialess en castellanu, siendo'l distingu especial na estaya "Testimoniu Históricu" pa "A ver si se saca el sombrero, señor..." de Andrea D´Atri, estaya na que tamién tuvo mención especial "Carta abierta a un minero" de María Begoña Herrero Pérez.

El premiu de lliteratura minera "Manuel Nevado Madrid" organízalu la Fundación Juan Muñiz Zapico, entidá dependiente del sindicatu CCOO y que fai alcordanza d'una de les figures más simbóliques de la transición n'Asturies. "Xuanin el de Mieres" yera l'únicu asturianu encausáu nel famosu "procesu 1001" que sentó, cuando la dictadura yá taba dando les boquiaes, a un bon garapiellu de sindicalistes nel escañu de los acusaos. La dictadura pidía castigos descomanaos pa ellos, y en concreto, solicitaba 18 años de cárcel pa Muñiz Zapico, que dempués quedaron en cuatro. El sindicalista asturianu ye tamién una figura importante na historia del sindicatu Comisiones Obreres, el más importante n'Asturies hasta los años 70 y del que foi ún de los sos fundadores. El 2 de xineru del 77, un accidente de coche acabó cola so vida, convertiéndose'l so intierru na Frecha (L.lena) al que foron miles de persones, nun actu de duelu y tamién de fuerte calter políticu