La Fundación Caveda y Nava entama un alderique nel Muséu de la Sidra sobre’l futuru del asturianu

|

El Muséu de la Sidra, asitiáu en Nava, va acoyer esti sábadu l’alderique ‘Aú va la llingua: perspectives pal sieglu XXI’. Cuatro espertos van dar el so puntu de vista sobre’l futuru del idioma nesti actu entamáu pola Fundación Caveda y Nava.

“Depués de cuasi que 40 años d’asturianismu llingüísticu, la llingua asturiana y la so reivindicación atópense nun momentu inciertu, quiciabes a les puertes d’un cambiu tovía non definíu. Nestes circunstancies, la Fundación Caveda y Nava quier entamar un fondu debate onde s’intercambien idees alredor de qué ye lo qu’asocede y qué víes de futuru tien la revindicación llingüística”, esplica la entidá nun comunicáu. Asina, la fundación presidida por Ramón D’Andrés va axuntar mañana, a les 11 hores, nel recintu museísticu navetu a cuatro espertos pa tratar esti asuntu: Pilar Fernández (profesora), Antón García (escritor y editor), David Guardado (filólogu) y Taresa Lorences (escritora y filóloga). El propiu D'Andrés va encargase de moderar el debate.

Nun primer momentu, según el guión previstu fechu públicu pola Fundación Caveda y Nava, nel alderique va tratase la ‘Situación del movimientu de reivindicación y defensa de la llingua asturiana a día de güei’, pa depués discutir ‘¿En qué consiste’l futuru del asturianu’ y ‘De quién depende’l futuru del asturianu’. Tamién van ser temes de debate l’estatus llegal de la llingua asturiana, la so situación na política asturiana y les perspeutives pa les llingües minoritaries. Esta iniciativa, que tien entrada llibre, cuenta cola collaboración del Muséu de la Sidra, el Conceyu de Nava y el Llagar Viuda de Corsino. Tienen confirmada la so presencia al actu Ana Fueyo, direutora xeneral de Política Llingüística, y Emilio Ballesteros, alcalde de Nava.

 

Contador Estadistiques