La Fundación Caveda y Nava celebra esta tarde la so xornada

La Fundación "Caveda y Nava" celebra güei sábadu 12 de payares la yá tradicional xornada de la fundación en Villaviciosa que llega yá con esta a la so III Edición. Como tolos años, la Fundación va acoyer a los sos nuevos patronos d'honor, merecimientu que-yos correspuende esti añu a la presidenta de l'agrupación del Partíu Popular de Xixón Pilar Fernández Pardo, a la que va presentar l'ex-presidente del Real UviéuManuel Lafuente, y al alcalde de L.lena y presidente de la Federación Asturiana de Conceyos Hugo Alfonso Morán, al que va presentar el diputáu de la FSA-PSOE Faustino Álvarez.

L'actu de recibimientu a los nuevos patronos va desarrollase como n'años anteriores nel monesteriu de Valdedios (Villaviciosa) a les 18:00 hores. Darréu d'ello, los actos de la III Xornada de la Fundación van treslladase a Villaviciosa, onde, dempués del homenaxe a Xosé Caveda y Nava, que va tener llugar na so casa de nacencia de la Cai del Agua, la Casa de Cultura de Villaviciosa va atechar la presentación del llibru "El marcu llegal del asturianu: víes pal reconocimientu de los derechos llingüísticos" del que ye autor D. José Manuel Pérez Fernández, patronu de la Fundación y profesor titular de Derechu Alministrativu na Universidá d'Uviéu.

Presidida pol tamién responsable de l'asociación de defensa del patrimoniu de Villaviciosa "Cubera" Etelvino González , la Fundación Caveda y Nava, que defende un consensu social de mínimos a favor de la llingua asturiana, ígüenla dende l'añu 2001 personalidaes de relevancia na sociedá asturiana. Tolos años, con motivu de la Xornada, ye tradición que los Patronos d'Honor qu'ingresen a la mesma sían xente con nome propiu y qu'ocupen davezu bien de titulares na prensa asturiana pola so especial relevancia profesional y social. Asina, nel añu 2003 entraron a la Fundación Emilo Marcos Vallaure, director del Muséu de Belles Artes d'Asturies y l'antiguu arzobispu d'Uviéu, Gabino Díaz Merchán. Nel añu 2004 les patrones d'honor foron la diputada na Xunta Xeneral Paloma Uría y la Cronista Oficial d'Uviéu, Carmen Ruiz Tilve.