La Fundación Belenos asoleya’l númberu 32 de la revista ‘Asturies, memoria encesa d’un país’

Berto Álvarez Peña y Javier Cubero presentaron esti martes el númberu 32 de la revista ‘Asturies, memoria encesa d’un país’. Esta espublización de la Fundación Belenos va pasar a ser de calter añal, según adelantó Álvarez Peña.

La Sociedá Cultural Xixonesa acoyó la presentación del númberu últimu d’esta revista que, como ye vezu, vien cargada d’artículos d’interés. Nesta ocasión, los llectores de ‘Asturies, memoria encesa d’un país’ van poder disfrutar de los trabayos siguientes: 'El mayéu Busián (Ḷḷena): orixe d’una braña na Edá del Bronce', de Jorge Camino Mayor; 'Los torques d’Argul (Pezós)', d'Alberto Álvarez Peña y Alfonso Fanjul Peraza; 'Les cases soportalaes d’Avilés y les sos «mirilles»', de Manuel Mallo Viesca; 'Delles considerances alredor de Xosé Faes «capitán de los carlistes, resurrección de Pelayo»', de Javier Cubero de Vicente; 'Peslleres, maniyes y picaportes. Artesanía del fierro nes puertes de les cases asturianes', d'Inaciu Hevia Llavona y Alberto Álvarez Peña; 'Don Pelayo, primer rei de los astures. Testimoniu d’una saga escaecida: la hermana de Don Pelayo', de Gausón Fernande Gutierri; 'El potru, un elementu etnográficu escaecíu', de Daniel Cueli Canto; 'Normes xenerales pal usu y disfrute de la sidra', d'Inaciu Hevia Llavona; y 'El Son d’Arriba y los Cantos de Ramos nel Vaḷḷe de Naviegu (Cangas del Narcea)', de Santos Nicolás Aparicio.

Nel actu, Álvarez Peña, del conseyu de redaición de la espublización, fixo un repás históricu de les actividaes que vien desendolcando la Fundación Belenos nos años últimos y anunció que la revista va pasar a ser de calter añal. Pela so parte, Cubero, autor d’ún de los artículos, destacó la urxencia de xenerar pontes y circuitos ente los sectores distintos del texíu socio-cultural asturianu, señalando que la retroalimentación ye fundamental pa una sociedá civil viva y dinámica.

Na semeya, Cubero y Álvarez Peña.