La fuelga llegó a tolos requexos d'Asturies

La concentración de protesta convocada pola Xunta Moza n'Uviéu dientro de la xornada de paru nos institutos de secundaria asturianos poles condiciones d'enseñu de la llingua asturiana axuntó a cerca de 250 rapacinos y rapacines d'Uviéu, ciudá onde'l seguimientu del paru foi total.

En munchos conceyos de tamañu pequeñu y medianu tamién hebo un seguimientu mui altu del paru, casos de Siero, o Llanera. Xeográficamente, el seguimientu de la fuelga abarca tol territoriu asturianu, y pel oriente, en Llanes hebo paru dafechu, mientres que en Nava y Cangues d'Onís foi de más del 80%. Pel occidente pasó otru tanto, con paru dafechu nel IES de Cangas del Narcea y del 90% Tinéu, ello anque la directiva avisare de que diba poner falta d'asistencia por dir a la fuelga. Nes cuenques mineres repítese'l panorama, con paros de más del 90% nos IES de Ciañu y de La Felguera

L'únicu conceyu onde la participación nun foi tan espectacular foi Xixón, onde namás dos institutos, el de les Ursulines yel de la Universidá Llaboral, rexistraron un paru superior al 80%, siempre según datos de la organización convocante. Sicasí, la baxa participación en Xixón esplícase, a lo menos en parte, pola actuación de dellos centros. Delegaos de clas d'institutos como'l Calderón o el Feijoo comentaron a Asturies.com que nos sos centros les respectives xefatures d'estudios posicionáronse cláramente a la escontra de la fuelga y torgaron una mayor participación na mesma. Según estudiantes del Calderón, el director d'esti centru díxo-yos que nun se podía dir a la fuelga porque "nun taba convocada oficialmente" y prohibió que s'abandonare'l centru, mientres que'l director del IES Feijoo, según declaró ún de los delegaos de clas, nun dexó facer xunta de delegaos pa falar sobre la convocatoria de fuelga y quitó los carteles puestos en centru anunciándola.

Con too y con ello, un pequeñu grupu de miembros de Xunta Moza allegáronse hasta la Plaza l'Ayuntamientu con una pancarta y cola intención d'entrega-y a la Conceyala d'Educación y Llingua Asturiana Carmen Rúa copia del manifiestu de la fuelga. La conceyala, que va poco manifestó en público que en Xixón la Conseyería d'Educación nun taba mandando los mayestros que se precisaben pa cubrir l'aumentu de la demanda d'asturianu nos IES del conceyu, taba aconceyada nesi intre precisamente col Conseyeru d'Educación, José Luis Iglesias Riopedre, polo que los militantes de la organización entregaron la documentación nel Rexistru del Conceyu.