"La fuelga d'enseñanza espeyó'l conflictu llingüísticu n'Asturies"

Acabante la xornada de fuelga nes enseñances medies convocada por Xunta Moza en protesta pola situación de la enseñanza del asturianu nel sistema educativu, a la valoración positiva de la organización convocante, que fala d'un siguimientu ente l'ochenta y el cien por cien, contradizse cola valoración de la Conseyería d'educación, que faló d'un siguimientu "desigual". N'Asturies.com falamos con Iyán González, ún de los responsables de Xunta Moza, sobre la fuelga d'ayeri.

- Acabante de terminar la fuelga ¿Qué valoración facéis d'esta xornada?

IG - Mui positiva, tamos mui contentos col resultáu d'esti fechu históricu, porque ye la primer vegada que los estudiantes asturianos taben convocaos a parar y manifestase pola llingua d'Asturies y la rempuesta foi inmeyorable. La fuelga cumplió l'oxetivu que nos marcábemos de facer visible'l conflictu llingüísticu d'Asturies, un conflictu del que ye responsable tanto la Conseyería d'Educación como tol gobiernu que ta xunta ella y que permite que pasen coses como les que tan pasando na enseñanza, onde s'imponen cupos que dempués nun se cumplen, onde l'asignatura apaez como optativa en cuenta de voluntaria, como manda la llei y onde hai munchos centros que nin se molesten n'ufiertar la opción d'asturianu nos impresos de matrícula, ente otres coses

Sicasí, la valoración d'esi trunfu nun se comparte dende la Conseyería d'educación, que fala d'un siguimientu desigual y da cifres más baxes ¿qué tenéis que dicir dende la Xunta Moza sobre esto?

IG - Nosotros trabayamos con datos fiables que nos apurren mayestros y hasta direcciones d'institutos, casu del de Trubia, onde'l mesmu director del centru reconoció que'l paru foi total. Lo que quier dicir la Conseyería con "siguimientu desigual" nun lo entiendo, si se refieren a qu'en dellos centros siguieron la fuelga un 80% y n'otros el 100% pues claro que foi "desigual". En cualquier casu, pa que la Conseyería reconoza oficialmente cifres d'incidencia del 20 y del 25% ello quier dicir que la fuelga tuvo muncha más repercusión real y, por supuesto, muncha más de la qu'ellos contaben.

- Una de les causes de les que faláis nel comunicáu oficial de valoración de la fuelga pa esplicar la baxa participación de dellos centros ye la "represión" por parte de les directives ¿qué pues ampliar sobre esto?

IG - Sí, ye cierto. Sabemos qu'en bien de centros los directores amenazaron con tomar midíes contra los delegaos de clase y los estudiantes que secundaren la fuelga y que n'otros llugares, sobremanera en Xixón, llegó a trancase la puerte pa nun dexar salir a la xente. Xunta Moza vamos facer agora un seguimientu de toos estos casos y vamos falar colos estudiantes pa tomar les midíes afayadices.

- D'otra manera ¿contabeis con un siguimientu tan altu de la fuelga? ¿qué foi lo que más vos sorprendió d'esta xornada?

IG - Sorprendiéronnos munches coses, delles positivamente y otres negativamente. En primer llugar, allegrónos ver que la movilización llegó a toa Asturies, incluso a les ales, onde organizativamente tenemos menos presencia y llamaben a la Xunta pidiéndonos carteles y materiales. En segundu llugar sorprendiónos que centros concertaos como les Ursulines de Xixón respondieren tan bien a la convocatoria, y, yá no negativo, sorprendiónos la política represiva de dellos centros que nun dexaron nin salir a los estudiantes. ¡Que diferencia con va añu y pico, cuando lo de la Guerra d'Irak, que solo-yos faltaba echar a la xente de clase pa que fuera a les movilizaciones!

- Y d'agora en p'alantre ¿qué va pasar col asturianu na enseñanza?

IG - Pa nosotros va siguir siendo un campu de trabayu fundamental , y amás la fuelga reforzó a la organización, porque valió pa que muncha xente nuevo s'allegare a la Xunta Moza, xente con idees y con iniciativa pa sacales alantre. De momentu nun tenemos pensao cuál va ser el siguiente pasu na movilización, pero vamos siguir a ello.