La fuelga de pilotos d’IBERIA obliga a cancelar dellos vuelos n’Asturies

La convocatoria d’una fuelga de pilotos realizada pol “Sindicato Español de Pilotos de Líneas Aéreas” (Sepla) na aerollínia IBERIA, ente’l 10 y el 16 de xunetu va obligar a cancelar cientos de vuelos d’esta compañía, algunos con orixe o destín n’Asturies. Asturies.com tuvo accesu al llistáu de vuelos cancelaos el primer día de fuelga. Con orixe n’Asturies cancélense tres vuelos a Madrid: el de les 8.50, 18.00 y 21.35 y ún a Barcelona, el de les 19.20.

Asinamesmo suprímense’l Barcelona-Asturies de les 16.30 y los de Madrid con destín a Asturies de les 7.00, 16.10 y les 19.45.

L'aerollínia informa que los clientes con vuelu canceláu deberán empobinar a la oficina d’IBERIA o axencia de viaxe na que mercaron el billete pa que-yos informen de les distintes alternatives. La compañía devolverá l’importe de los billetes o permitirá’l cambiu de fecha a los clientes con algún vuelu ente’l 10 y el 16 de xunetu que lo soliciten. Les devoluciones y cambios de fecha tarán permitíos hasta’l 31 de xunetu de 2006. La causa d’esti paru ye la participación d’ IBERIA na nueva compañía de baxu coste Catair, que los pilotos consideren esta una "filial emboscada a la qu'Iberia quier ceder parte de los sos derechos".