La FSA suspende les negociaciones con IX-BA-LV pol casu de Cangas del Narcea

La Federación Socialista Asturiana decidió ayeri suspender pel momentu la negociación del pautu de gobiernu con Izquierda Xunida, que güei tenía acutada fecha pa una nueva reunión. La causa d'ello ta nel incumplimientu, por parte d'IX, del alcuerdu al que llegaren dambes formaciones pa repartise'l gobiernu nos conceyos. El secretariu d'organización de la FSA Jesús Gutiérrrez dio anuncia de la suspensión de les negociaciones, en recibiendo un parte de la coalición d'izquierdes en qu'esta informaba de la negativa de los sos conceyales en Cangas a renunciar a l'alcaldía que llograren colos votos del PP y pidía más tiempu pa tratar la situación.

La FSA pidiera que los conceyales d'IX renunciaren a l'alcaldía o que'l so partíu los espulsare.

Nun a resolución aprobada ayeri pela tarde, IX reconoz que l'actitú de los sos conceyales incumple los alcuerdos cola FSA y el PSOE pero afirma que'l líder de los socialistes de Canfas, José Manuel Cuervo, portóse de manera "prepotente" na negociación pa llegar a un alcuerdu nel conceyu, anque IX diz qu'ello nun pue ser sida pa o que se fexo, que ye valtar los alcuerdos pa escoyer alcalde.

Na nota de la so executiva, IX diz que trabaya "intensamente" p'alcontrar igua al conflictu que reconoz que pasa pela dimisión del so alcalde, cosa qu'asegura que persaben los trés conceyales d'Ix de Cangas, que de nun dimitir sedríen espulsaos de la ccoalición. La dirección d'IX alvierte, tocante a la rempuesta dende la FSA, que nun almite l'ultimatum y llamenta que'l PSOE garre esti episodiu como sida pa francer les negociaciones, poniéndose a disposición de la FSA pa recuperar el diálogu.