La FSA propón repetir les intervenciones en castellanu si daquién na Xunta Xeneral diz nun entender l’asturianu

|
Xunta Xeneral con Barbón y Blanco

“Ye una discriminación. Ponse una carga especial al que fala n’asturianu y en gallego-asturiano, esixendo coses a unos que nun s’esixen a otros”, aseguró Daniel Ripa, de Podemos, a la salida de la Xunta de Voceros, onde se trató l’usu del asturianu na Xunta Xeneral. La FSA propón repetir les intervenciones n’asturianu en castellanu nel casu de que daquién dixera nun entender l’idioma, prevaleciendo siempre’l castellanu nel diariu de sesiones.

La Federación Socialista Asturiana (FSA-PSOE) ufre una propuesta pa l'aplicación del puntu 2 del artículu 3 bis del Reglamentu, que diz que “la Mesa de la Cámara, oyida la Xunta de Voceros, adoptará, nel so casu, los criterios oportunos a tal efeutu”, en referencia al derechu de cualquier persona a emplegar l'asturianu na Cámara, que na práutica ye una torga al so usu. Asina, la posibilidá de qu’un diputáu asturianu dixera nun entender una intervención en dalguna de les llingües propies del país obligaría al otru parllamentariu a repetila en castellanu o a apurrila per escrito.

Amás, nel diariu de sesiones quedaría rexistrada namái la fecha en llingua castellana, dándose’l casu de que diputaes qu’intervienen na Cámara ensin papeles, como Nuria Rodríguez López, de Podemos, vieran como’l so primer discursu esvaneciera. “Ye una discriminación. Ponse una carga especial al que fala n’asturianu y en gallego-asturiano, esixendo coses a unos que nun s’esixen a otros”, aseguró un críticu Ripa, que nun tien dulda nenguna en que “tolos diputaos del Parllamentu asturianu entienden perfeutamentes les intervenciones que se tan faciendo n’asturianu y en fala, y lo que se ta produciendo en realidá ye un intentu de boicó a la normalización política de la llingua asturiana”.

El voceru de Podemos alertó amás que la midida que se decida va ser “indefinida, pa siempre, independientemente de la esistencia d’oficialidá”. “Na práutica ye la eliminación del derechu, la regulación definitiva de la discriminación y un nuevu pasu nuevu nel boicó a la normalización llingüística”, apuntó Ripa, qu’afala “a facer normal lo que ye normal na sociedá”.

Cuestión de “intolerancia”

En declaraciones recoyíes por Europa Press, Adrián Pumares, de Foro, tamién duldó qu’haya dalguien na Xunta Xeneral que nun entienda l’asturianu y rescampló que “esto nun ye un problema de comprensión, sinón d’intolerancia”. La postura que defende ye una intervención doble, n’asturianu y castellanu, col doble del tiempu nel casu d’una “supuesta incomprensión”, poniendo en cuestión la capacidá d’estos diputaos pa representar a la sociedá asturiana “si nun son quien a entender la so llingua”.

Semeya obra d'Armando Álvarez.

Contador Estadistiques