La FSA píde-y al PP qu'aclarie si apoya la oficialidá

El secretariu d'Organización de la FSA-PSOE, Jesús Gutiérrez, pidió-y ayeri al Partíu Popular que defina la so postura en rellación a la cooficialidá de la llingua asturiana. Nun comunicáu que pue vese na páxina web de la FSA-PSOE, Gutiérrez pidió a los 'populares' asturianos que respuendan si "defenden la cooficialidá o non".
Gutiérrez refirióse asina a les "ambigües" declaraciones del alcalde d'Uviéu, Gabino de Lorenzo, qu'apeló a una mayor protección de la 'llingua' y dempués de que'l conceyal de Cultura del Conceyu participara nuna marcha a favor de la oficialidá.

"Nun val escondese detrás de fórmules como más apoyu, porque la FSA-PSOE quier un apoyu máximu a la llingua asturiana", dixo Gutiérrez, quien s'entrugó si "l'alcalde d'Uviéu y el presidente del PP d'Asturies quieren trespasar la llende de la oficialidá o non".
Jesús Gutiérrez entrugó al alcalde si'l so conceyal de Cultura representaba al Conceyu o al equipu de Gobiernu municipal na marcha pola oficialidá del pasáu sábadu. "¿Ta l'alcalde d'alcuerdu col so conceyal o non?¿Representa les posiciones del PP o non?", señaló Gutiérrez "porque la conseña de la marcha nun falaba d'apoyu al asturianu, sinón d'oficialidá del asturianu".


La FSA-PSOE espresó, de nuevu, la so posición el pasáu sábadu, al traviés del so secretariu xeneral, Javier Fernández, nes qu'afirmaba que "tola protección pal asturianu, que tol mundiu lo conoza y el que lu quiera deprender que lo faiga, cola única llende de la oficialidá".