LA FSA entama un alderique sobre "les oportunidaes de la oficialidá pa la industria cultural d'Asturies"

|
LA FSA entama un alderique sobre "les oportunidaes de la oficialidá pa la industria cultural d'Asturies"

María Luz Pontón, secretaria d’Educación, Universidaes y Normalización Llingüística de la FSA, va moderar na ‘Semana Negra’ l’alderique ‘Les oportunidaes de la oficialidá pa la industria cultural d’Asturies'. El secretariu xeneral y futuru presidente del país Adrián Barbón acudió un añu más a la Fiesta de la Oficialidá de Bimenes, onde aseguró que “hai que salvar l'asturianu del so desaniciu”.

La 'Carpa de la Palabra' del certame cultural y festivu xixonés al rodiu la lliteratura prieta va acoyer esta tarde esta mesa redonda entamada pola Federación Socialista Asturiana (FSA)-PSOE, na que van participar persones destacaes del mundu cultural asturianu. Asina, dende les 21.30 hores van dar les sos impresiones sobres esti asuntu los escritores Berta Piñán y Inaciu Galán, la cantante Anabel Santiago, el periodista Cristóbal Ruitiña y el traductor y alministrador de la Wikipedia n’asturianu, Víctor Suárez.

Esti eventu llega dos díes depués de les declaraciones feches pol que será escoyíu presidente d’Asturies, tres l’alderique d’investidura que va comenzar el xueves na Xunta Xeneral, mientres la XXIII Fiesta de la Oficialidá de la Llingua Asturiana, en Bimenes. Habitual nesta celebración nos años anteriores como alcalde de Llaviana y secretariu xeneral de la FSA, Barbón nun faltó a esta folixa que conmemora la declaración d’oficialidá nel conceyu nel 1997, a la qu’acudió acompañáu de Gimena Llamedo, secretaría d’Organización de la FSA, de la diputada Esther Fraile, y de los primeros ediles de Nava, Juan Cañal; de Colunga, Sandra Cuesta; de Sobrescobiu, Marcelino Martínez; y de Cabranes, Gerardo Fabián Fernández, amás de Pontón.

“La primer reflexón que tenemos que facer ye que hai que salvar l’asturianu del so desaniciu; ye la primer referencia qu’hai que poner enriba la mesa. Y qu’hai que facer tolo que tea na nuesa mano pa qu’una parte de la nuesa cultura, del nuestriu patrimoniu inmaterial, la nuesa forma de ser como asturianos y asturianes, nun se pierda”, destacó, pa depués afirmar que “la llingua de los nuesos güelos hai que treslladala tamién a los nietos”. Con 26 parllamentarios favoratibles a la oficialidá –28 contando colos dos de Foro, formación que nel so programa lleva la oficialidá cuando haya consensu y se compromete trabayar nesa direición–, Barbón recordó que “falta un diputáu y nun sabemos lo que va pasar”, anque añadió que “la llexislatura ye mui llarga”.

Barbón defende un modelu “ensin sectarismos nin imposiciones, pero poniendo per delantre que los asturianos y asturianes teamos arguyosos de la nuesa tradición y de la nuesa cultura”.

Bimenes, de celebración

Martimporra foi’l sábadu una gran celebración. L’alcalde Aitor García Corte, d’Asturianistes por Bimenes, reelexíu con mayoría absoluta, abrió la xornada con un discursu nel que criticó a los qu’intenten imponer “pa decidir qué ciudadanos son de primera y de segunda”, y que califiquen a los falantes d’asturianu como aldeanos: “yo soi aldeanu con arguyu”, reivindicó.

Darréu l’actriz María Cotiello lleó’l pregón de la XXIII Fiesta de la Oficialidá y entamóse la Danza pola Oficialidá. La folixa treslladóse entós al prau del Palaciu del Marqués de Casa Estrada, onde hebo la xira popular que contó con muncha música y el concursu d’escanciadores, finando la xornada bien entrada la nueche con un Bimenes en Danza.

Na semeya, Barbón, segundu pela izquierda ente Cotiello y el primer edil de Cabranes, posa en Martimporra con delles persones, ente ellos l'alcalde de Bimenes, García Corte, vistíu col traxe'l país.

Contador Estadistiques