La Folixa na Primavera protagoniza l’actividá festiva d’esta fin de selmana

Mieres yá ta preparada pa vivir trés díes de celebraciones. Llega la Folixa na Primavera, actividá que trai esti sábadu a Asturies a Rua Mcmillan. L’escocés va xubir al escenariu del Parque Xovellanos tres l’actuación de La Tarrancha.

Un pasucais del Grupu de Baille Xorrecer va dar entamu, a les 18 hores, a la Folixa na Primavera, anque la inauguración oficial nun ta prevista hasta les 20 hores. Javier Fernández Lopez, direutor del Muséu del Ferrocarril d'Asturies, va encargase de lleer el pregón pa, darréu, dar pasu al actu d’entrega del XIII Distintivu a la Investigación Folklórica ‘Fini Suárez’, qu’esti añu va pal presentador del programa de los 40 Principales ‘Música para raptar princesas’ y crítico musical, Aurelio Argel, pola so promoción de la música tradicional asturiana nos medios de comunicación. Quince minutos enantes de l’apertura oficial de la fiesta nel Parque Xovellanos, va entamase cola preba de sidra. Esti añu ta previstu’l repartu de baldre de 2.500 llitros de la bébora tradicional del país.

Mañana va tener llugar el día grande de la Folixa, con actividaes y sidra dende’l meudía y la celebración, a partir de les 13 hores, del festival de tonada, cola participación d’Adotino González, Laudelina Hortal, Celestino Rozada, José Manuel García y Iván Rionda (gaiteru). Pela tarde, la preba de sidra va principiar a les 19 hores, tiempu suficiente pa calentar motores pa los conciertos d’esti añu, protagonizaos pola banda de mecigayu-ska La Tarrancha (23 hores) y de Rua Mcmillan (01 hores). El violinista escocés ye un de los músicos de música tradicional más valoraos d’Alba y vien de ser ún de los artistes más destacaos nes dos ediciones últimes del Festival de Ortigueira. Hasta la fecha tien espublizáu un álbul en solitariu, de nome ‘Tyro’ (2010), amás de delles grabaciones con The Paul McKenna Band.

La Folixa na Primaver va vivir el so día caberu’l domingu y tendrá como broche d’oru’l conciertu de la Banda de Música Mieres del Camín (13.30 hores). Mierenses y visitantes tamién van poder disfrutar de la sidra a partir del meudía.

Menú de la Folixa na Primavera

Ente les munches actividaes paraleles a la Folixa na Primavera destaca’l menú qu’ufierten estos díes 13 chigres de la ciudá: Larpi, Alberto, La Solana, El Cenador del Azul, L'Albar, Casa Óscar, Consistorial, La Xagosa, Casa Flora, Alonso, La Posada de Bacus, Casa Genio y La Vega. Ésti ta compuestu por sopa d'ablanes o menestra del tiempu; bacaláu o cabritu; y borrachinos o sorbete de sidra. Amás, tamién se pue visitar nel Auditoriu Teodoro Cuesta la esposición 'La Folixa del '96 a güei'.