La fola de fueu asela cola baxada de les temperatures

La Conseyería de Xusticia Seguridá Pública mandó ayeri desactivar el plan INFOPA, dispositivu especial de Protección Civil contra Incendios Forestales que llevaba funcionando dende primeros de la selmana pasada dempués de que les altes temperatures prendieren fueos per toa Asturies. Entovía ayeri, dempués de dase de baxa'l dispositivu especial, taben prendíos 17 fueos en distintos conceyos.

La situación que se vivió nesti mes de marzu ye asemeyada a la que se da n'otros años per esti tiempu, una repetición que lleva a los colectivos conservacionistes asturianos a llamar l'atención sobre la falta de previsión qu'aprecien nel executivu asturianu sobre esti particular. La Coordinadora Ecoloxista, nun comunicáu qu'emitió ayeri valorando la situación que se vivió estes selmanes, llega a la conclusión de que "desgraciadamente, lo que ta pasando estos díes nun ye sorpresa nenguna". El grupu ecoloxista diz que'l que se repitan les mesmes situaciones un añu trés d'otru vien de la falta de polítiques de previsión sobre'l fueu. Con reconocer que se fizo un esfuerzu importante na estinción, que ye agora más efectiva qu'enantes, la coordinadora atalanta qu'había facese una inversión en prevención que diba resultar a la llarga "muncho más rentable lo mesmo a nivel económicu como d'impactu que la inversión n'equipos d'estinción.

Los ecoloxistes denuncien qu'Asturies "nun avanzó prácticamente nada" na investigación y combate de les causes que provoquen el fueu, y como preba d'ello remembren qu'esti añu dexóse pa prau un interesante proyectu de Brigaes d'Investigación de Causes del Fueu que llevaba funcionando dende diba trés años. En consecuencia, esti añu nun s'investigó según la Coordinadora la causa de nengún fueu.

Otramiente, la Coordinadora denuncia la falta de planes d'acción preventivos qu'afalen el cambéu del aprovechamientu forestales basáu na quema del monte, por otros más racionales. Otru pasu imprescindible tendría de ser el de la prohibición del usu del suelu quemáu en casu de que se demostrare que s'obtuviere daqué beneficiu económicu de la quema. Otra amuesa d'esa falta de previsión espeyaríase nel fechu de que los planes d'ordenación de los montes n'Asturies nun recueyen la prevención del fueu como base de la planificación, permitiendo programes de repoblación con especies úniques y con marcos de plantación que nun contemplen midíes contra'l fueu.

La crítica de los conservacionistes asturianos llega tamién a la Guardería Rural, qu'aseguren que ta baxo mínimos y que ta prescindiéndose d'ella cada vegada más na llucha contra'l fueu. D'otra manera, la Coordinadora propón que se faigan tamién programes de concienciación pa la reciella, y pon el casu de que l'únicu que se fizo estos años, que foi en cangas del Narcea, vieno gracies a una iniciativa del Ministeriu de Mediu Ambiente, non del Gobiernu asturianu.