La fiscalía va investigar los vertíos de la mina d’oru al Narcea

La fiscalía d'Asturies abrió dilixencies d'investigación pola denuncia que presentare l'Asociación Asturiana d'Amigos de la Naturaleza (ANA) sobre los vertíos que fixere al ríu Narcea la empresa Río Narcea Gold Mines (RNGM) nes sos instalaciones del conceyu de Salas.

ANA diz na so denuncia que los vertíos de RNGM contaminen el ríu al tenor de lo que dicen los resultaos de prebes del agua del Narcea, nes que s'atopen concentraciones d'arsénicu y antimoniu mui superiores a lo permitío, según se conseña nel escritu del fiscal.

La denuncia, presentada pol presidente d'ANA Carlos Lastra, diz que la concentración d'arsénicu en ríu yera de 330 partes per billón, cuando'l tope afitáu llegalmente ta en 50, mientres que d'antimoniu la concentración yera de 700 partes per billón. La denuncia d'ANA, tamién fai referencia como preba a la emisión d'un documental na canal de TV Cuatro sobre los vertíos de la mina en que s'enseñaben desagües de la mesma al ríu, y pide que s'investigue si los fechos demostraos tanto nel documental como n'otres prebes aportaes son constitutivos de delitu contra'l mediu ambiente y la salú pública, alvirtiendo del agravante dau pola tradición salmonera del ríu y l'emplegu del agua que lleva pal consumu humanu de dellos conceyos.