La filoloxía asturiana, ausente nel proyectu de reforma universitaria

Pa mediaos del mes qu'entra va conocese en que para la reforma de les titulaciones universitaries, una reforma obligada en cuantes que los títulos que se dan nes universidaes españoles han d'adaptase al marcu del espaciu común educativu européu. La llargamente esperada titulación en Filoloxía Asturiana yera una de les candidates a convertise nuna realidá col entamu d'esti procesu, pero les cartes paez que vienen mal daes pa la titulación qu'igualaría a la llingua del Padre Galo coles demás llingües del estáu nel planu académicu.

Ello ye qu'una de les primeres consecuencies de la reforma, al tenor de lo qu'apaez nos documentos preliminares colos que se trabaya, va ser la mengua del númberu de titulaciones y la desapaición de munchos títulos universitarios de gran tradición, una circunstacia que va dexar a les llingües minorizaes del estáu arrequexaes y revueltes con otres filoloxíes dientro d'otres titulaciones que van articulase alredor d'una llingua mayor nes titulaciones entitulaes "Llingües modernes y les sos lliteratures" y "Llingua española y les sos lliteratures". Asina lo espeya la propuesta firmada pol rector de la Universidá Autónoma de Madrid Ángel Gabilondo Pujol, documentu base col que se trabaya na reforma.

El documentu de los decanos, qu'entovía nun ye definitivu, pue sufrir modificaciones al alza pero tamién a la baxa sobre una propuesta d'aniciu que nun beneficia un res al oxetivu de la filoloxía asturiana, y ye que por de pronto la propuesta nin siquiera fai referencia a la fililoxía asturiana, y namás fala de "les restantes llingües españoles: catalán, gallegu y vascu". Esta redacción fai tamién desapaecer l'actual titulación en filoloxía catalana, una decisión que sacó angüeñes en Barcelona, onde CiU y ERC calificaron la posible desapaición de la filoloxía catalana como "animalada inaceptable". Grupos catalanistes sorrayaron amás l'agraviu comparativu que supón la desapaición de la so filoloxía de la universidá española "cuando hai decenes d'universidaes europees con estudios de catalanística" según denunció Omnium Cultural.

En cualquier casu, la propuesta de los rectores france les esperances que s'abrieren va agora un mes cuando l'asuntu taba entovía en manes de los decanos de filoloxía. D'aquella, la decana de la universidá asturiana y presidenta de l'Academia de la Llingua propunxere la entrada de la filoloxía asturiana nel debate y nel borrador provisional, consiguiendo l'asentimientu de tolos 16 decanos del grupu de decanos españoles. La decana asturiana llamó entós a la prudencia en cuantes qu'entovía quedaba munchu camín per andar na redacción definitiva de los títulos.