La fiesta ensin oficialidá

L'Ayuntamientu de Bimenes celebra esti fin de selmana la VII Fiesta de la Oficialidá, cola que se fai alcordanza de la declaración, en 1996, de la oficialidá del asturianu nel territoriu del conceyu yerbatu, el primeru d'una prequeña riestra d'ayuntamientos d'aquella gobernaos los más d'ellos por Izquierda Xunida -en Casu foron los votos del PP los que dieron la oficialidá- que declararon una oficialidá que'l tiempu demostró que tenía más de simbólico que d'efectivo.

Yera tiempu aquel de mediaos de los 90 d'una reforma estatutaria -la cabera- que pal asturianismu peslló en falso al nun espeyase les demandes históriques na lletra final de la Carta Magna asturiana, pero la reforma tamién dexó pal asturianismu derrotáu el gol de la vergüenza en forma d'una llei d'usu que, hasta agora nun ye otro que papel moyao y en forma tamién de media docena de conceyos que se remontaron pa declarar l'asturianu oficial, anque ello tampoco valió pa muncho.

Les declaraciones formales nunca nun s'acompañaron de midíes normalizadores efectives, sacantes quiciás el casu de Llangréu, onde funcionó una oficina de normalización a lo llargo de toa esta llexislatura, pero ello foi que dende fuera tampoco nun dexaron qu'estes declaraciones salieren alantre. Fernando Fernández Noval, d'aquella delegáu del Gobiernu y conocíu enemigu del asturianu, encargose en persona de pleitear contra aquellos pronunciamientos inocentes, que foron cayendo un tres d'otru al ritmu machacón de les sentencies que soltaba'l Tribunal Superior de Xusticia d'Asturies, anque la película de les anulaciones entovía tien rollu gracies a los recursos que punxo l'Ayuntamientu de Llangréu énte'l Tribunal Superior y los que nun descarta poner nel Constitucional.

Sicasí, l'asturianismu anda estos díes a otra cosa. El sorprendente resultáu electoral y los alcuerdos ente IX y PSOE faen qu'esti asuntu de les declaraciones d'oficialidá suene un poco a música vieyo nel tocadiscos el bable, pero por ello nun vamos dexar de dar anuncia d'una fiesta, la de la Oficialidá en Bimenes, pequeña y modesta, pero que ye d'agradecer que se faiga pa remembrar aquel alzamientu asturianista, aquel pequeñu Villalar escontra l'estociniu del idioma. Dende Asturies.com encamentamos a pasar per Bimenes. Hai actividaes dende'l xueves 3 hasta'l domingu 6 y el día grande ye esti sábadu 5 de Xunetu en Xenra, con nueche folk incluyía.