La Fiesta de la Sidra Natural de Xixón da aniciu a les sos actividaes

El Concursu d’Escanciadores va protagonizar la primer xornada de la XX Fiesta de la Sidra Natural de Xixón. La edición d’esti añu va terminar enantes de lo habitual tres la decisión de la organización de pesllar la folixa’l domingu a les 15 hores.
 
D’esta forma, la preba de sidre de baldre que tolos domingos de la Fiesta enllenaba de xente la Plaza Mayor y la plaza’l Marqués pela mañana y pela tarde, va durar nesta ocasión namái hasta les 15 hores. Una decisión que nun tuvo un bon recibimientu ente los habituales de la folixa, como pue comprobase peles redes sociales; inclusive hai xente que ta convocando pa continuar cola celebración na mesma Plaza Mayor tres el piesllu de la fiesta oficial. “Lo que pretendemos con esti recorte ye mantener esi espaciu de fiestá, llúdicu, entrañable, de compañerismu, de compartir… Pero cuando se lleva un consumu prolongáu d’alcohol a veces pue resultar que la fiesta nun sía tán agradable”, argumentó Rosabel Berrocal, responsable de la organización de la Fiesta de la Sidra Natural.
 
Camín, JR, Los Gemelos, El Gobernador, Castañón, Canal, Piñera, Peñón, Acebal, Buznego, Menéndez, Huerces, Trabanco, Vallina, Arbesú, La Nozala, Llagar de Castiello, Cabueñes, Llagar Bernueces y Frutos, son los llagares que van participar nesta ocasión na Fiesta. La preba de sidra va principiar a les 12 hores col escanciáu del primer culín y la entrega del Tónel d’oru d’esti añu a Manuel Arbesú Fernández, y va prolongase hasta les 15 hores.
 
Otra de les novedaes d’esti añu ye la celebración del Concursu d’Escanciadores, puntuable pal Campeonatu d’Asturies, el xueves, dexando como actividá principal pal vienres l’intentu p’algamar un récor nuevu d’escanciáu simultaneu de sidra. La competición que va abrir esta primer xornada va principiar a les 17 hores na Plaza Mayor, mentes que la playa d’El Natahoyo va acoyer un asaltu nuevu al Guinness a les 20.30 hores de mañana, anque los preparativos van dar comienzu a les 19 hores.
 
Tamién el xueves va producise l’apertura del Mercadín de la Sidra y la Mazana que se sitúa na zona de los Xardinos de la Reina y que s’allarga hasta’l domingu a les 22 hores. Una bona oportunidá pa dar un paséu y mercar productos de toda triba rellacionaos cola fruta y la bébora más asturiana. Mentes, el vienres y el sábadu va repetise la esperiencia de los ‘Buses de la sidra’ que lleven a tolos interesaos a conocer el Muséu del Pueblu d’Asturies y un llagar de los munchos qu’hai en Xixón. Asina, por un preciu de 15 euros pue visitase les instalaciones de Trabanco (16.30 hores, vienres), Menéndez (11 hores, sábadu) y Piñera (16.30 hores, sábadu), prebar lo so sidra y comer quesos asturianos. Los puntos de venta d’entraes pa esta actividá son los puestos d’información turística de Xixón. El númberu de places per autobús, con salida na parada del Fomentín, ye de 15.
 
Lo que nun va cambiar nesta edición de la Fiesta de la Sidra Natural de Xixón son los Cantares de chigre que tolos años enllena la Plaza Mayor de xente dispuesta a cantar en comuña temes tradicionales asturianos. La cita va ser el sábadu a les 21 hores y los asistentes van tener ayuda audiovisual pa siguir les canciones nel casu de que nun conozan o recuerden dalguna de les lletres.