Selmana de les Lletres Asturianes

La Fiesta de la Oficialidá de Bimenes vuelve a la fecha orixinal

|

Tres el cambiu del añu pasáu pa evitar coincidir col Festival de la Sidra de Nava, la Fiesta de la Oficialidá de Bimenes torna a la fecha y al formatu orixina. Lluis Portal Hevia va ser, el 6 de xunetu, el pregoneru de la celebración.

Na decimosesta edición d’esta folixa que conmemora la declaración d’oficialidá nel conceyu yerbatu –torgada llueu pol Tribunal Constitucional– nel Plenu del 5 de xunetu del 1997, apostóse por adelantar la celebración al 16 de xunu p’axuntala cola tradicional Romería Asturiana que se celebra en mayu y entamar la Romería de la Oficialidá, anque namái de manera circunstancial. Asina, la XVII Fiesta de la Oficialidá de la Llingua Asturiana, que resiste pese a la retirada de les ayudes del Conseyería d’Educación, Cultura y Deporte, y de la Obra Social de CaxAstur, torna a celebrase’l primer sábadu de xunetu, nesti casu’l día 6, como ye vezu.

L’actividá va principiar a les 11.30 hores na Plaza de la Casa Conceyu, en Martimporra, con una misa oficiada por José Manuel García de Jesús y cantada por El Corrielu la Pandorga, a la que va siguir una intervención del alcalde, Alejandro Canteli Rozada. Darréu, alredor de les 12.15 hores, l’escritor, periodista y investigador maliayu Lluis Portal Hevia, pa depués celebrar la ‘Danza de la oficialidá’, que va correr a cargu de Los Yerbatos, grupu folclóricu que tamién va protagonizar, a les 13 hores, un pasucais hasta polideportivu del pueblu xunto con La Flor del Pumar. Na instalación deportiva, amás de les actuaciones d’estes dos formaciones, va tener llugar, a partir de les 14.30 hores, la xinta popular, que va consistir nuna parrillada con costielles, pitu y chorizu criollu. El so preciu ye de 18 euros y inclúi tamién el pan, el postre y la bébora. El día caberu pa mercar los vales, na Casa Conceyu, ye’l martes 2 de xunetu.

Yá de tarde, a les 17 hores, va celebrase’l XIV Concursu de Gaita de Bimenes, nel que van tomar parte 16 músicos nel orde siguiente: Enol García González (Samartín del Rei Aurelio), Inés González Suárez (Llanera), Pablo Vicente Fernández Fernández (Siero), Javier Muhlach Relea (Uviéu), Álvaro Álvarez Fernández (Siero), Pablo Lorenzo García (Grau), Illán Escalada Martínez (Villaviciosa), Fernando Vázquez Cárcaba (Siero), Daniel Naredo Tuero (Sariegu), Andrés Blanco Montes (Bimenes), Fabián Fernández Fernández (Llanera), Diego Lobo Tuñón (Ayer), Rebeca Rebollo Rodrigo (Xixón), Tomás Montes Hevia (Parres), Adrián Villarrica Martínez (Villaviciosa) y Emilio Amboaje Rodríguez (Ayer). Los premios entregaránse a les 21 hores, pero enantes va tener llugar una amuesa de cuatriada a cargu de la Peña Rozaes. Va zarrar la xornada festiva, a partir de les 22 hores, un conciertu del Ensame Astur Los Yerbatos, Alienda y l’Ajo Band.

Actividaes complementaries

Alredor del XVII Fiesta de la Oficialidá de la Llingua Asturiana tamién se van entamar delles actividaes complementaries na Casa la Cultura de Santuyano, como la representación, el vienres día 5, de la obra ‘Llueven tías’, a cargu del grupu de teatru llastrín Las Tres Luces. Una selmana depués va tener llugar una Xornada Lliteraria na que se van entregar los premios del XVI Concursu de Cuentos pola Oficialidá y na que se va presentar el númberu 11 de la revista lliteraria d’autores mozos Formientu.

 

Contador Estadistiques