La FIDMA zarró les puertes con 1.073 visitantes menos que nel 2010

La LV Feria Internacional de Muestres d’Asturies (FIDMA) tuvo 1.073 visitantes menos que na edición del añu pasáu. El númberu total de persones que pasaron pel recintu ferial Luis Adaro ente’l 6 y el 21 d’agostu foi de 700.648.
 
Pa la Cámara de Comerciu de Xixón, institución qu’entama esti eventu, les cifres ponen de manifiestu que “la Feria sigue formando parte de la vida económica, social y cultural tanto d’Asturies como de las rexones de la so redolada”. Amás, la organización destacó l’ésitu del Día de Lleón, qu’ainició la so andadura l’añu pasáu y que nesta edición “resultó mui interesante tanto dende’l puntu de vista d’asistencia como de consolidación d’espectatives y apertura d’oportunidaes nueves”.
 
D’igual forma, destacó el “númberu eleváu d’actividaes de calter téunicu y social, asina como la respuesta bona de los ciudadanos a delles iniciatives plantegaes” nos 16 díes de la FIDMA, como foi la asistencia a la Feria en bicicleta el Día del Mediu Ambiente, con entrada de baldre pa les persones qu’utilizaren esti mediu de tresporte. “L’afluencia elevada de visitantes y la satisfaición xeneral de los espositores –pese a la recesión económica xeneralizada– ponen de manifiestu que dambos siguen apostando pola so presencia na Feria Internacional de Muestres d’Asturies”, concluyó l’órganu cameral.