La Federación Española prohibió l’usu de banderes autonómiques tres la final del Européu sub-21

La RFEF nun permite l’usu de banderes autonómiques na recoyida de trofeos de les sos seleiciones tres la final del Européu sub-21 del 25 de xunu. Esta decisión diose a conocer tres l’incidente de Ginés Meléndez cola bandera d’Asturies.
 
La midía, que nun se fixo pública hasta ayeri cuando se llevantó la polémica pol xestu de despreciu del téunicu de la seleición española sub-19, Gines Meléndez, hacia Juan Muñiz al retira-y de males maneres la bandera d’Asturies que llevaba atada al pescuezu, tuvo’l so orixe na celebración del Campeonato d’Europa sub-21 de Dinamarca celebráu en xunu. Tres derrotar na final a Suiza por 2-0, dellos xugadores celebraron la victoria coles banderes del so país. Asina, pudieron vese distintivos andaluces, catalanes, vascos y tamién asturianos, de la mano de José Ángel, Mata y Adrián. Ésto nun prestó a los dirixentes de la Real Federación Española de Fútbol (RFEF), n’especial al presidente Ángel María Villar, que dio orde de que nun se repetiera la situación. Asina, la RFEF prohibió de manera interna l’usu de les banderes autonómiques nes celebraciones, al menos enantes de la recoyida del troféu.
 
Maximino Martínez, presidente de la Federación Asturiana, salió ayeri en defensa de Meléndez por esti motivu, anque nun xustificó les formes del téunicu d’Albacete. Al paecer, el seleicionador nun avisó a los xugadores d’esta midía, polo que Juan Muñiz, de forma natural, garró la so bandera pa celebrar el títulu. Sicasí, Meléndez, pese al so escaezu, al ver el collor azul sobre la camiseta blanca del xugador del Sporting corrió hacia’l xixonés y arrebató-y la bandera d’una manera agresiva.
 
L’aición de Meléndez –que tien sangre asturiano por parte de pá, natural de la cuenca’l Nalón, y familia en Xixón– y la decisión desconocida hasta la fecha de la RFEF d’evitar l’apaición de banderes autonímiques nos ésitos de los combinaos estatales, foi tema de debate ayeri nos medios de comunicación y redes sociales. Dende partíos asturianos, como Izquierda Xunida y Bloque por Asturies-UNA, mostraron el so refugu a l’actitú del albaceteñu, y coleutivos y persones de tol Estáu criticaron la midida qu’impide a los xugadores mostrar la bandera de los sos países d’orixe y namái permite l’usu de la d’España.
 
Na semeya, el momentu nel que los xugadores de la seleición sub-19 recoyeron el troféu de campeón d'Europa. Nella pue vese, a la izquierda, una bandera d'España atada al pescuezu d'un futbolista.