La Federación Asturiana de Bolos confirma n’asamblea la so salida de la Española

68 votos a favor, 6 en contra y 4 astenciones confirmaron la salida de la Federación Asturiana de Bolos de la Española. Les amenaces de la Direición Xeneral de Deportes de dexar a l'Asturiana ensin sovenciones nun afectaron la votación.
 
D’esta forma, la Federación Asturiana de Bolos, presidida por Desiderio Díaz, sigue’l mesmu camín que la Cántabra y va trabayar de manera independiente con respeuto de la Federación Española de Bolos. Esta votación yera la segunda que se celebraba con esti asuntu sobre la mesa y la segunda vegada que l’asamblea decidía la salida de la Asturiana de la federación estatal. Nesta ocasión, tuvo que repetise pola intromisión de la Direición Xeneral de Deportes, qu’anuló l’alcuerdu anterior alegando un defeutu de forma.
 
L’amenaza llegada dende’l Gobiernu d’Asturies pa dexar ensin sovención a los bolos asturianos nun frenó la decisión tomada poles peñes, xugadores, árbitros y monitores. En concreto, l’asamblea celebrada ayeri n’Uviéu modificó los estatutos que vinculaben a l’Asturiana cola Estatal y aprobaron una derrama de 6 euros por cada llicencia federativa pa compensar un recorte de 6.000 euros na sovención de la Direición Xeneral de Deportes.
 
La Federación Asturiana de Bolos recueye les modalidaes de batiente, bowling, celta, cuatriada, lleonés, birle, rodáu y vaqueiru. Les voces discordantes cola postura xeneral de l’Asturiana proceden del mundu del bowling o bolu americanu, y del birle o bolu palma, que consideren que la Federación mira namái pola cuatriada.