La FCyN considera que “espertó la conciencia de que l’asturianu ha asitiase nun terrén d’acuerdu” cola so actividá

Error message

  • Notice: Undefined index: boostpath in include_once() (line 259 of /var/www/clients/client1/web2/web/sites/default/settings.php).
  • Notice: Undefined index: boostpath in include_once() (line 260 of /var/www/clients/client1/web2/web/sites/default/settings.php).
|

Espublizó esti xueves el comunicáu nel qu’espón los motivos de la so disolución. La entidá pon el futuru del idioma “en manes de los determinos y midíes concretes que desurdan de les instituciones y de la sociedá asturiana”.

Con fecha del 6 d’avientu, anque asoleyada esta mañana, la Fundación Caveda y Nava (FCyN) redautó’l comunicáu final de los sos cuasi 14 años de trayeutoria. Foi tres la reunión del Patronatu de la entidá celebráu’l día 1 nel que, a propuesta de la direutiva presidida por Ramón d’Andrés, tomóse por mayoría’l determín de cesar l’actividá de la Fundación al “entender que les circunstancies que xustificaron el crease camudaron sustancialmente, de manera que la so misión pue dase por cumplida, pues la so función dexó de tener el sentíu que tuvo nel so día”. Al empar, el Patronatu  decidió nesi conceyu trespasar el so patrimoniu económicu “a dos conocíes asociaciones asturianistes”.

En xineru del 2012 echó a andar esti proyeutu cola fin “de trabayar por construyir diálogu y consensu alredor del fechu llingüísticu asturianu, más allá de les llexítimes diferencies de los distintos axentes sociales y políticos”, teniendo como base la realidá de que l’asturianu “ye una llingua en peligru que precisa de midíes pa la so sobrevivencia”. La FCyN, a diferencia d’otres organizaciones esistentes, escoyería trabayar “na información, na persuasión y eso que se da en llamar ‘tender pontes’”.

El decálogu ‘Bases pa un Consensu sobre la Llingua Asturiana’ recoyía eses idees, apostando pola moderación y el diálogu “nuna situación que, daquella, percibíase polarizada y allancada, con un enfrentamientu maximalista ente dos sectores, ún favorable a la normalización y oficialización del asturianu, y otru contrariu a ella, col consiguiente perxuiciu pa la normal aceptación d’avances na dignificación y usu social de la llingua asturiana”.

Afitáu’l consensu de mínimos

“L'actividá de la FCyN llogró llamamientu públicu y presencia social y institucional. Espertó la conciencia de que l’asturianu ha asitiase nun terrén d’acuerdu, implicando a amplios sectores de la sociedá. Col pasu los años, constatamos que les idees centrales de la FCyN fueron espardiéndose en munchos sectores que de mano mostraben series rocees nesti terrén. Na actualidá, l’estáu xeneral d’opinión pa cola llingua asturiana coincide básicamente coles idees que la FCyN ayudó a esparder socialmente. N’efectu, compruébase que nos ámbitos mayoritarios y representativos de la vida social, cultural y política asúmese normalmente que l’asturianu ye un patrimoniu y un drechu cívicu: les

posiciones dialogantes y pragmátiques sobre la reivindicación llingüística xeneralizáronse; asumiéronse de mou xeneral idees promovíes pola Fundación, como son la necesidá d’un consensu sociopolíticu alredor del asturianu o la gradualidá nel camín de los drechos llingüísticos. Les postures maximalistes al respective de la llingua asturiana dexaron de ser un pilancu”, afirma la FCyN nel comunicáu, entidá qu’entiende que “afitáu esi consensu de mínimos, ta too por facer: agora’l futuru de la llingua asturiana queda en manes de los determinos y midíes concretes que desurdan de les instituciones y de la sociedá asturiana. La Fundación «Caveda y Nava», en resultes, considera cumplida la so misión”.

Por últimu, la direutiva de la FCyN espresa’l so agradecimientu “a los miembros de la entidá (patronos, socios collaboradores, patronos d’honor), porque ensin les sos voluntaes y esfuerzos nun fuera posible’l proyectu; y a les distintes entidaes socioculturales, fuerces polítiques, instituciones, medios de comunicación y ciudadanos en xeneral, que nos dieron el so apoyu y supieron pescanciar el mensaxe que queríemos tresllada-y a la sociedá asturiana”.

Contador Estadistiques