La fase d'ascensu a Segunda B entama esta fin de selmana n'Avilés

Cuatro equipos de Tercera aspiren a la plaza asturiana pa dar el saltu de categoría.

CD Lealtad, Llanera, CD Covadonga y Caudal van competir na fase d'ascensu rápida diseñada pola Real Federación Española de Fútbol pa salvar la temporada tres la crisis sanitaria pola pandemia de COVID-19 qu'obligó a parar les competiciones. Primeru y cuartu cuando faltaben 10 xornaes pal final de la Lliga, y segundu y terceru, van enfrentase nuna eliminatoria direuta esta fin de selmana cola intención de pasar a la final d'onde va salir l'únicu equipu asturianu con billete pa la Segunda División B.

Tolos partíos van celebrase nel Suárez Puerta y en casu d'empate nel tiempu reglamentariu'l 'llocal' –el que finó meyor clasificáu– va pasar ensin falta de xugar prórroga nin penaltis. Mañana, a les 19 hores, van vese les cares Lealtad y Caudal, mentes que'l domingu a la mesma hora van facelo Llanera y Covadonga.

La final ta prevista la selmana siguiente, el sábadu, tamién a les 19 hores. Tolos partíos van xugase ensin públicu.

Na imaxe, estadiu Román Suárez Puerta. Semeya obra d'Asturkian baxo llicencia CC BY-SA 4.0.