La familia de María Teresa González dedica una web a la escritora cola so obra completa

|
María Teresa González

Esti 23 de mayu cúmplense 25 años de la muerte de l'autora de Tremañes.

La obra completa de María Teresa González Fernández ta disponible a tolos llectores gracies a una páxina web creada pola familia. Toles persones que la visiten van atopar tamién una completa biografía de la escritora, una análisis de la so obra y una bibliografía.

El so fíu Mauro ye'l responsable de la mesma, contando cola collaboració del so padre y vildu de la xixonesa, Vicente García Oliva. Xunto col so maríu, González foi una de les fundadores del nucleu xixonés de Conceyu Bable nel 1975, escribiendo los sos primeros poemes hacia'l 1984.

'Collaciu de la nueche', nel 1987, foi'l so primer poemariu, al que siguieron 'Ochobre' (1988) y 'Heliocentru' (1993), escribiendo tamién en prosa nel llibru de rellatos 'La casa y otros cuentos' (1994). Toes estes obres, amás d'otres participaciones n'antoloxíes y revistes lliteraries, queden recoyíes nesta cuidada páxina web que s'estrena güei coincidiendo col 25 aniversariu del día nel que la lliteratura asturiana perdió a esta autora con namái 45 años.

Pa consultala ha calcar equí.

 

Contador Estadistiques