La familia Castañón

Dempués de siete años apaeciendo nel suplementu de veranu del Diariu La Nueva España, la "familia Castañón" son yá un pequeñu clásicu. El so padre y dibuxante, Igor Medio, faló con Asturies.com sobre'l pasáu, presente y futuru de la saga más coñona del tebéu asturianu, que tien cuerda pa un bon cachu.

¿En que momentu naz la Familia Castañón?

Buf, aquello foi una aventura. Yera l'añu 1997 y yo taba acabante de terminar los estudios de Belles Artes en Salamanca cuando recibí una llamada de Javier Cuervo, de La Nueva España de Xixón, diciéndome que queríen una tira de continuidá de costumes asturianes. Lo gordo yera que la queríen en menos de 48 hores, asina que nun tiempu record discurrí los personaxes y presenteme con ellos na redacción. Aquel primer añu foi duru d'alma, porque tuve que dir faciendo les tires cásique "al día" y yo tampoco nun tenía mui claro per onde podíen tirar aquellos personaxes.

Yá pasaron siete años d'aquello ¿pa onde evolucionaron los Castañón?

Ficiéronlo en munchos sentíos, y alégrome d'ello, porque de mano yo pensaba "y si estos personaxes nun dan más de sí, y si canso de facelos y me veo equí amarráu con ellos…" Pero por suerte nun foi asina. En tou esti tiempu caún d'ellos foi asitiándose dientro de la serie y, si a lo primero toles tires respondíen más a un modelu costumista y a una serie de situaciones más o menos estándares, agora permítome facer tires nes que cada personaxe pue sacar el so mundu interior. Yo nesti sentíu siempre fui seguidor de tires como los "Peanuts" o "Calvin y Hobbes" que son tires de continuidá pero que nes que cada personaxe tien el so mundu particular. Ello nun quita pa que dacuando sigas metiendo tires con esi humor más "editorial Bruguera" de hosties y sapotazos, que tamién presta.

Y caro, nun podíemos dexar de facete la entruga que manca ¿de tolos personaxes con cual quedes?

Home, ye evidente que'l güelu da munchu xuegu, porque ye'l personaxe que más te permite xugar coles tires y el que ruempe más les situaciones, pero cada personaxe tien la so especialidá, y al traviés d'ellos intento espeyar situaciones distintes en que podemos venos toos. Yo nesi sentíu téngo-y especial apreciu a la madre, que ye'l personaxe al través del que puedo facer llegar un mensaxe pa mí quiciás más interesante, por tola cuestión que tien alredor d'ella de la situación y la problemática de la muyer na familia, y ye que los Castañón son una familia matriarcal, pero, que dulda cabe… el güelu ye un puntazu.

Dexando descansar un poco a los Castañón, que tan acabante de terminar otru veranu, vamos falar un poco de la sitruación del tebéu asturianu. Tu y otra xente como Ruma Barbero o Javi Cactus entrastis a primeros de los 90 nel mundu del cómic n'Asturies como unos autores con estilos y con histories nueves que contar, sacando alantre esperiencies como la editorial catus comics, que duraron bien poco ¿crees qu'hai sitiu pa una escena de comica asturianu?

Yo pienso que si. Hai países cola mesma dimensión y población qu'Asturies que tienen los sos creadores de comic y qu'espeyen nes sos histories la so propia sociedá, colo que creo qu'equí tien qu'haber güecu pa ello, y amás nesi sentíu Asturies tien una gran ventaya al tener un rexistru billingüe asturianu y castellanu que ye mui aprovechable y que ye, per se, una gran riqueza.