Selmana de les Lletres Asturianes

La falta de gol, problema común de Sporting y Uviéu nel arranque

|

Los roxiblancos consiguieron la victoria pola mínima nel 88, mentes que los azules nun pudieron pasar del empate nel Tartiere.

La Segunda División echó a andar esta fin de selmana con dos partíos como llocales de los dos equipos asturianos, qu'algamaron resultaos desemeyaos. El Sporting consiguió los 3 puntos in extremis énte la debutante Unión Deportiva Logroñés, mentes que l'Uviéu empató ensin goles con otru recién ascendíu, el Cartagena.

La falta de gol concrétase como'l problema actual de los dos equipos, con trés selmanes per delantre pa tratar de solucionalo: el 4 d'ochobre pieslla'l mercáu. Los xixoneses, ensin fichaxes, amosaron les mesmes faltes que la temporada pasada, con dificultaes na creación, y siendo superior al so rival, namái un pase xenial de Manu García que definió bien Djurdjevic pudo frayar la igualada.

Mentes, los uvieínos, que tuvieron la baxa de Rodri, pudieron dir al descansu con una ventaya cómoda, pero la madera –en dos ocasiones– o la falta de puntería impidió que los de Ziganda s'adelantaren nel marcador. Na segunda parte tornaron les ocasiones nidies ensin ver puerta, lo que llevó al 'Efesé' a rondar la meta de Femenías nel tramu final.

Necesidá de refuercios

Francisco Javier Vicente Rico y Francesc Arnau siguen trabayando nos despachos pa tapar les faltes de dambos conxuntos. Nel casu del Sporting l'oxetivu ye un estremu rápidu y vertical que permita xenerar más ocasiones al equipu, siendo l'escoyíu'l catalán d'orixe congoleñu Mboula, propiedá del Monaco que la pasada campaña tuvo cedíu nel Cercle Brugge belga y nel Huesca –col que ganó’l títulu de Segunda–, qu'espera que se sigan produciendo salíes nel equipu tres la de Cordero al Marbella pa poder fichar, mentes que la incorporación d'un tercer delanteru ta aparcada de momentu.

Pela so parte, l'Uviéu sigue buscando nel mercáu xugadores pa reforciar delles posiciones, siendo ún de los deseos un delanteru contrastáu. Con Obeng como futbolista mozu cola confianza del mister, Mújica como fichaxe atacante y con Rodri fuera dalgo más de dos meses por lesión, Arnau quier zarrar un sustitutu d'Ortuño, máximu goliador del equipu l'añu pasáu con 14 tantos, que garantice una cantidá asemeyada al güei futbolista del Albacete, club que lu cedió al conxuntu azul l'añu pasáu.

 

Contador Estadistiques