La faba dio un reblagu nel 2004

La faba asturiana tuvo nel 2004 el so meyor añu dende la creación del Conseyu Regulador de la Denominación Específica "Faba d'Asturies". La producción del añu foi en total de 187.932 kilos, el 21% más que los 159.520 del 2003, y el cultivu de la faba tomó un total de 96,5 hectárees, un 12% más de superficie.

La faba con denominación allégase asina a les 200 tonelaes nun añu en que'l tiempu vieno mui bien y la planta nun acusó'l dañu de la seca nes selmanes en que cuayen les caxes de les fabes que se notó na temporada del 2003, añu en que la producción quedó en cifres asemeyaes a les del 2002. La faba asturiana, d'otra manera, ta faciendo un bon güecu nel mercáu d'esportación, y ye qu'el 90% de la faba con etiqueta del Conseyu viéndese fuera d'Asturies, pero'l mayor problema pa la faba de denominación vien de la importación de faba de fuera, sobremanera de dellos países d'América como México, qu'entra a precios muncho más baratos y que se viende engañosamente como faba asturiana en munchos casos.

España, Francia o Alemaña son dellos de los mercaos onde se viende la faba asturiana, entrando anguaño Corea al grupu de mercaos onde s'esporta esti llegume.