La estimación de votu del CIS da ganador n’Asturies al PSOE, anque nun podría repetir pautu de gobiernu con IX-LV

El PSOE ganaría les eleiciones n’Asturies según la estimación de votu del Centru d’Investigaciones Sociolóxiques (CIS) al sumar 19 escaños (35,7 por cientu). El Partido Popular (PP) se quedaría con 16 escaños (32,2 por cientu), Foro Asturias Ciudadano (FAC) con 7 (15 por cientu) y Izquierda Xunida-Los Verdes d’Asturies (IX-LV) con 3 (8,2 por cientu). Bloque por Asturies-UNA (BA-UNA) nun algamaría representación na Xunta Xeneral al sumar un 1,1 por cientu de los votos, al igual qu’Unión Progreso y Democracia (UpyD), que se queda nun 1,9 por cientu.

Esta situación abriría l’abanicu de posibilidaes pa depués de les eleiciones. La perda d’un escañu d’IX impidiría la reedición del pautu de Gobiernu ente’l PSOE y la coalición al sumar ente los dos 22 escaños, mentes que dexaría a la derecha la posibilidá de xunise pa garrar el Gobiernu d’Asturies al contar con 23 escaños ente’l PP y FAC. Sicasí, les relaciones ente les dos formaciones nun son bones tres la marcha de Francisco Álvarez-Cascos del partíu depués de nun ser proclamáu candidatu de los populares a la presidencia del país.
 
En comparanza colos resultaos anteriores, el PSOE perdería dos escaños; el PP, cuatro; y IX-LV, que nel 2007 se presentó tamién xunto col Bloque por Asturies, ún. Quedaríen fuera de la Xunta Xeneral UPyD, tres los sos bonos resultaos nes europees, y Bloque por Asturies, que nestos momentos tien un diputáu. Los nacionalistes, que van en coalición con Unidá Nacionalista Asturiana (UNA), algamaríen el 1,1 por cientu de los votos. Na convocatoria última, UNA, que se presentó baxo la marca Unidá, algamó un 0,69 por cientu de los votos (4.119), lo que supón una meyoría pequeña al mesmu tiempu qu’insuficiente, según les estimaciones del CIS. Ello situaría’l númberu de votos de BA-UNA nuna cantidá cercana a los 6.000. Otra manera, el porcentaxe que da’l CIS a otros partíos ye del 2,9 por cientu, mentes que’l de votos en blancu situaríase nun 3 por cientu.
 
La encuesta, fecha ente’l 17 de marzu y el 17 d’abril, destaca como’l políticu más valoráu polos asturianos a Javier Fernández, candidatu del PSOE, con una nota d’un 4,56 sobre 10, anque un 24,9 por cientu dice nun conocelu. La segunda meyor nota ye pa la popular Isabel Pérez-Espinosa (3,76), mentes que’l cabezaleru d’IX-LV, Jesús Iglesias, recibe una nota de 3,63 y Rafael Palacios, candidatu de BA-UNA, de 3,15. Nesti sen, Palacios cuenta col handicap de que’l 53,6 por cientu diz non conocelu.