La estación de Valgrande-Payares abre esti sábadu

La cantidá de nieve cayida por cuenta'l temporal de la fin de selmana pasada permite adelantar un mes la temporada d'esquí.

El 30 de payares yera la fecha prevista pa l'apertura de les dos estaciones asturianes, Valgrande-Payares y Fuentes de Invierno, pero "la cantidá de nieve esceicional" presente lleva a la Direición Xeneral de Deportes a abrir la primera esti mesmu sábadu. "Tenemos un espesor mínimu de 70 centímetros y máximo de 1,30", esplicó José Ramón Tuero, que dada les condiciones óptimes permite dar usu a "dos sielles, la cuatriplaza d'El Brañiḷḷín y la del Valle del Sol" con "6,6 quilómetros esquiables" en " doce pistes: cuatro verdes, trés encarnaes y cinco azules".

Los abonos del añu pasáu son válidos y los precios del forfait caltiénense. Hasta'l día 30 la estación va abrise namái les fines de selmana, mentes que Fuentes de Invierno siguirá trancada por mor del sistema de contratación del personal de la estación, lo que ta provocando protestes n'Ayer.

Na semeya, estación de Valgrande-Payares nuna imaxe d'archivu.