La esposición 'Voces' comienza en Cabranes el so percorríu per Asturies

Pue visitase hasta'l 13 d'abril na Casa la Cultura María Xosefa Canellada.

‘Voces. La llingua n’Asturies al traviés de los sieglos’, la esposición que tuvo más de 5.000 visitantes nos meses que tuvo abierta al públicu nel Muséu Arqueolóxicu d'Asturies con motivu del programa ‘Cuadonga Centenarios’, comienza a xirar per Asturies. La primer parada ye Cabranes, onde va acompañase de talleres y charres, además de visites guiaes que van anunciase próximamente.

Formada por paneles triangulares tresportables y audiovisuales, la intención de la Conseyería d’Educación y Cultura dende un primer momentu yera que l'amuesa percorriera los conceyos del país. La Casa la Cultura María Xosefa Canellada, asitiada en Santolaya, ye la escoyida pa inaugurar esti viaxe pola historia social y cultural d'Asturies al traviés de la llingua coordináu por Xulio Viejo, profesor universitariu que contó cola collaboración de Ramón d’Andrés y Roberto González-Quevedo na parte académica.

Anque l'amuesa abrió les sos puertes la selmana pasada, esta mañana Fernando Padilla, direutor xeneral de Planificación Llingüística y Normalización, asistió a la so inauguración oficial. 'Voces' va poder visitase hasta'l 13 d'abril n'horariu de 9 a 21 hores, de llunes a vientres, y de 11 a 14 hores, los sábados y domingos, anque los sábados ye necesario llamar enantes al Muséu de la Escuela Rural.