La esposición que nun vamos poder ver n'Asturies

Inaugurose ayeri en Madrid la esposición que'l Bancu Santander preparó en collaboración con otres instituciones, ente elles la Obra Social y Cultural de Caxastur y Correos y Telégrafos con motivu de los 200 años de la muerte del illustráu asturianu Pedro Rodríguez, Conde de Campumanes. La esposición va poder vese hasta'l 11 de mayu nos salones de la Fundación Santander Central Hispano de Madrid y en negún sitiu más, colo que los asturianos nun vamos poder conocer de cerca la mayor esposición sobre ún de los ilustraos más importantes del país.

Según s'esplicó, ente la bayura de cuadros, documentos y materiales que dexaron pa la amuesa instituciones y coleccionistes particulares hai bien d'ellos que ye imposible andar moviéndolos d'un llugar a otru, colo que se decidió dexar la esposición namás en Madrid pol calter de "servidor del estáu" de la persona del Conde de Campumanes. Ente les ayalgues de la esposición hai diez cuadros de Goya y otros de Francisco Bayeu xunta la interesante serie de "Vistas de los Caminos y Puertos de España" de Mariano Sánchez y Luis Paret y Alcázar.