La Escuela d’Asturianía reactívase con 22 alumnos d’América y del Estáu depués del parón obligáu pola pandemia

El tercer cursu de la sesta promoción de la Escuela de Branu d’Asturianía arrancó esti llunes n’Uviéu depués del parón obligáu pola pandemia de COVID-19. Dende’l 2019 nun se celebraba esta cita na que participen 22 alumnos procedentes de centros asturianos d’Arxentina, Estaos Xuníos, Chile, México, Uruguai, Alacant, Madrid, Alcobendas y Valladolid que van formase en cultura asturiana hasta’l día 29.

L’oxetivu de la Escuela d’Asturianía ye dar conocimientos a monitores y monitores en cuestiones de música, deporte tradicional o llingua asturiana en dos especialidaes, gaita y baille tradicional, pa que puedan llueu treslladalos a la emigración y los sos descendientes. Pa ello acuden al país per trés branos siguíos pa recibir un total de 300 hores de clase.

El Conceyu d’Uviéu collabora na organización d’esta edición llueu de firmar un conveniu col Gobiernu al traviés de la Conseyería de Presidencia. L’Ayuntamientu pon les aules de la Escuela Municipal de Música Tradicional y el profeseráu encargáu de poner docencia, mentes que l’Executivu asume los gastos de profesoráu y la programación de la formación y de les actividaes estraescolares, destinando un total de 100.000 euros que tamién sirven pa cubrir los gastos d’agospiu, manuntención y desplazamientu nel casu de que los residan fuera del Estáu.

Los centros asturianos de Tucumán, Buenos Aires, Valparaíso, Santa Fe, Rivadavia, Miami, La Plata y Paraná son dalgunos de los representaos nesta edición de la Escuela d’Asturianía.

Na semeya, alumnes y alumnos de la Escuela d'Asturianía na inauguración celebrada esta mañana, na que participaron Rita Camblor, conseyera de Presidencia; Olmo Rom, direutor xeneral d'Emigración y Memoria Democrática; María Antonia Fernández Felguerosos, presidenta del Conseyu de Comunidaes Asturianes.