La escasa presencia del asturianu na web nueva de RTPA lleva a la XDLA a insistir nun cambiu na direición

Esta selmana RTPA renovó la imaxe de la páxina web y de les sos redes sociales, un cambiu que “nun supón una visibilidá mayor de les llingües que por llei RTPA ta obligada a protexer”. Por esti motivu, y pola falta d’avances nel usu del asturianu, la Xunta pola Defensa de la Llingua Asturiana (XDLA) reclama a los partíos “qu'empiecen el procesu pa cambiar la direición” del ente.

“L'asturianu sigue arrequexáu a una sección de noticies, con testos traducíos al asturianu pero que conserva la llocución en castellanu, y a una estaya-contenedor con dalgunos de los pocos programes n'asturianu emitíos a lo llargo de cuasi 20 años d'emisión. Per otru llau, l'usu de la toponimia ye marxinal y el gallego-asturianu ye una llingua que nun existe”, denuncia la organización, que considera que “la situación dexa a les clares la visión de la cultura y la llingua asturiana acomplexada que tienen dende RTPA y la necesidá d'un cambiu na direición”.

Recuerda la XDLA que “nun hai programación infantil nel nuestru idioma, la toponimia oficial ta marxinada, namás s'emiten programes d'entretenimientu n'asturianu si paga la Conseyería de Cultura y esta llingua ta vetada nos programes deportivos y nos doblaxes de llargumetraxes y series, mentes qu'en RPA nun hai espacios dedicaos a la música nes nuestres llingües”. Poro, dau’l mandáu del Estatutu d’Autonomía, de la Llei d’Usu y Promoción del Bable/Asturianu y de la propia llei de creación de la RTPA, “que dicen que los medios de comunicación públicos tienen que tener una presencia ‘amañosa’ de les llingües propies y tienen que ser una ferramienta p'ayudar a normalizar l'asturianu y el gallego-asturianu”, reclama a los partíos “qu'empiecen el procesu pa cambiar la direición de RTPA, porque l'actual mostró n'ocasiones reiteraes la so posición contraria a la normalización llingüística y al cumplimientu de la llexislación vixente”.

“Pa iguar esta situación nun fai falta esperar a la oficialidá, namás fai falta voluntá política. Pel momentu, depués de dos llexislatures d'Adrián Barbón la voluntá amosada sigue siendo la mesma que na llexislatura de Javier Fernández: la marxinación del asturianu”, conclúi la organización.