La épica esaxerada d'espartanos y perses toma la cartelera xunto cola despidida de Robert Altman

La recreación de la batalla de les Termópiles, na que nel
añu 480 a.c 300 espartanos enfrentáronse al mui superior en
númberu exércitu persa pa retrasar l'avance d'estos hacia Grecia
ye l'argumentu de"300",
estrena destacada de la selmana y basada nel comic homónimu
de Frak Miller y dirixida por Zack Snyder. La película ta interpretada
por Gerard Butler nel papel de Leónidas, rei de los espartanos y por
Rodrigo Santoro, qu'encarna a Jerjes, emperador persa. Sicasí esta
producción nun ta llibre de polémica yá que segun les
autoridades d'Irán (l'antigua Persia) "la película busca
conta-y a la xente qu'Irán, que ta nel Exe del mal según Bush,
foi durante muncho tiempu fonte de males y que los ancestros de los modernos
iraníes son como los salvaxes feos, fatos y asesinos que se ven en
300" según Javad Shamaqdari, conseyeru cultural del presidente
iraní Mahmoud Ahmadinejad.

Tamién llega a les carteleres del nuesu país la
película cabera de Robert Altman, director norteamericanu autor d'obres
como "MASH" o "Short cuts" que morrió'l pasáu
20 de payares. La so obra póstuma entitúlase
"El último
show", una comedia dramática musical que narra la historia d'un
programa radiofónicu que llucha por sobrevivir na época de
l'aparición de la televisión. La película ta interpretada
por Kevin Kline, Woody Harrelson, Tommy Lee Jones, Lindsay Lohan y Meryl
Streep. Mas estrenes d'esta selmana na nuesa
cartelera.