La EPA da una xuba del paru del 13,25% n'Asturies

L'Institutu Nacional d'Estadística ta acabante d'anunciar l'avance de datos de la Encuesta de Población Activa (EPA) del tercer trimestre del añu. Según la EPA, anque la ocupación xubió en más de 150.000 persones, ello nun foi a francer la escalada del paru, que rexistró ente xunetu y setiembre una xuba de 29.600 persones en tol estáu, colo que la tasa de paru estatal ye del 11,17% de la población activo. Asturies manda nes dos estadístiques, siendo la segunda n'aumentu d'activos (10.800 nuevos ocupaos, +2,85%) pero mandando d'otra parte la lista de comunidaes con xuba del paru con 6.000 nuevos desocupaos que suponen una xuba del 13,25%, a muncha diferiencia de Navarra, segunda na tabla con una xuba del 9,78%. El paru xubió en 10 CCAA y baxó n'otres siete, rescamplando ente elles la baxada de Baleares (-25%).

Con estos datos, Asturies queda cola cuarta tasa de paru más alta del estáu, (11,69%) y tampoco nun sal bien na interanual, na que gana un total de 12.300 paraos, como pue vese, la metada d'ellos nesti tercer trimestre del 2.003. Anque esta actualización de la EPA da una xuba importante del númberu d'activos, la tasa d'actividá total sigue siendo la más baxa del estáu, col 47,48%