La encuesta del CIS da-y ún escañu más a IX-BA-LV y quíta-ylu al PSOE

El PSOE perdería un escañu que ganaría IX-BA-Verdes y el PP caltendría'l resultáu del 2003. Esti ye'l primer avance que fai el CIS pa les elecciones autonómiques, qu'albidra pal PSOE un 40,2% de votos, mientres que'l PP se quedaría nel 36% y Izquierda Xunida col 13,2%, un repartu que dexaía los escaños na Xunta Xeneral en 21, 19 y 5 respectivamente. Les demás opciones de votu llograríen un 7,2% y un 2,7% de los encuestaos votaríen en blanco, acordies cola encuesta del CIS, fecha ente'l 9 d'abril y el 6 de mayu sobre la base de 1.1197 entrevistes personales a mayores de 18 años de les trés circunscripciones electorales.

La mayoría de los encuestaos, el 58,6 por ciento, creen que'l PSOE va volver a ganar les autonómiques, anque namás un 39,5% declaren que-yos prestaría esi resultáu. Un 12,5% creen que va ganar el PP, anque son el 26,3% los que-yos prestaría ver el trunfu d'Ovidio Sánchez. Por popularidá de los candidatos, el 95% declaren conocer al socialista Álvarez Areces, que llogra 5,54 puntos de valoración, mientres qu'Ovidio Sanchez, que s'allega al 90% de conocimientu, tien una valoración de 4,66. Jesús Iglesias, que s'allega al 70% de conocimientu, tien una valoración de 4,64 puntos

Ente los encuestaos, namás el 1 por cientu califica la situación asturiana de "mui bona", mientres que'l el 23,3% diz que ye "bona", el 51,5 califícala de "regular", el 19,1% de "mala", y el 5% de "mui mala". Cerca de la metada de los encuestaos ven la situación d'Asturies igual que va 4 años, el 25,1% diz que ye meyor, el 21,9% que ye peor" y el 7% "muncho peor".