La Encuesta de Población Activo da 6.000 paraos más

La Encuesta de Población Activo que correspuende al primer trimestre del 2004 da p'Asturies una cifra de 50.200 persones en paru, lo que supón una xuba de 6.000 persones sobre la estadística del últimu trimestre del 2.003. La Conseyería de trabayu remembra que la xuba, con ser grande, ye menor que la del primer trimestre del 2.003, cuando entraron a la llista del paru de la EPA 9.800 persones, colo que Asturies tien porcentualmente mnos paru que va un añu. El paru EPA n'Asturies ta asitiáu agora nel 11,42% contra'l 12,35% del 2.003 mientres que la media estatal ye del 11,3%.

La desigualdá ente sexos ye evidente na EPA asturiana, y asina mientres la tasa masculina ta nueve décimes perbaxo de la española, la tasa de paru EPA ente les muyeres asturianes ye del 17.01% contra'l 15,71% de media española. Esti datu por sexos contradiz dafechu la tendencia n'España nun trimestre en que xubió enforma la tasa d'actividá femenina

El númberu d'ocupaos ye de 389.500, 7.500 menos que nel trimestre anterior, pero con una xuba añal del +5,24% contra una media estatal del +2.56%. Sigún los datos oficiales, hai 19.400 persones ocupaes (trabayando) más de les qu' había nel primer trimestre del 2003, mientres que'l númberu d'activos (xente trabayando o en condiciones de facelo) ye de 439.700, un 0,36% menos que nel trimestre anterior, pero tamién con un crecimientu añal de 17.500 activos más. Con ello, la tasa d'actividá asturiana ye del 47,73% frente contra'l 45,74% de va un añu. Esta cifra encurtia un 1,17% la difereiencia cola media estatal, de la que tamos entovía bien lloñe y que ye anguaño del 55,36%.

La EPA tamién espeya la baxada de población absoluta d'Asturies. Según la Encuesta, Asturies tien 921.000 habitantes de 16 años p'arriba, un 1,9% menos que nel primer trimestre del añu pasáu. pues consultar equí'l documentu completu de la EPA